Gösta Bohman
.jpg)
Bo Gösta Bohman (* 15. Januar 1911 in Stockholm; † 12. August 1997 in Stockholm) weer en sweedschen Politiker. He weer vun 1970 bit 1981 de Parteivörsitter vun Moderata Samlingspartiet un vun 1958 bit 1991 Liddmaat vun’n Rieksdag. Vun 1976 bit 1981 harr he dat Amt vun’n swedischen Finanzminister.
Utbilln
[ännern | Bornkood ännern]Bohman hett de Volksschool besöcht un is na’n Afsluss 1932 Reserveoffizeer worrn. Veer Johr later hett he sien Examen as Jurist an de Universität Stockholm afleggt. He hett denn 1936 bit 1939 sien Deensttiet an’t Amtsgericht härardsrätten vun Södra Roslagen fardig maakt un is dorna as Leutnant to’n Wehrdeenst intogen worrn. Na’n Tweeten Weltkrieg is he Direkter vun de Hannelskamer vun Stockholm (Stockholms handelskammare) worrn, bit he 1970 to’n Vörsitter vun Moderata samlingspartiet (vörher Rechtspartei) wählt worrn is.
Politische Loopbahn
[ännern | Bornkood ännern]1958 keem Gösta Bohman in de tweetw Kamer vun de Stadt Stockholm un later ok in de erste Kamer. 1961-63 weer he Vörsitter vun de Stockholmer Rechtspartei un twee Johr later de eerste Viezvörsitter in’n Stüerutschuss vun’n Rieksdag. Na dat katastrophale Wahlresultat vun sien Partei 1970 hett he den Posten vun’n Parteivörsitter vun sien Vörgänger Yngve Homberg övernahmen.
Den Machtwessel in de swedischen Politik hett Bohman 1976 henkregen. He beschreev dat as den schönsten Ogenblick vun sien Leven. Tosamen mit Thorbjörn Fälldin un Ola Ullsten hett he de eerste nich sozialdemokraatsche Regeren siet mehr as veertig Johren in Sweden billt. He sülvst kreeg dat Amt vun’n Finanzminister. Ok in denafolgen Dreeparteienregeren weer he wieter Finanzminister, bit de Koalitschoon 1981 vörtietig uteneen fallen is. In’t glieke Johr is he as Parteivörsitter torüchpeddt. Sien Nafolger is Ulf Adelsohn worrn. Bohman hett in de Johren dorna sien politischen Memoiren schreven un is 1991 ut’n Rieksdag utscheedt.