Friedrich von Wardenburg
Friedrich Owe Sophus Ludwig von Wardenburg (* 29. Juli 1820 in Toftlund; † 2. Februar 1894 in Freiburg) weer en düütschen Diplomaat.
Von Wardenburg is an’n 29. Juli 1820 as Söhn von Auguste Sophie Jacobine, borene Hansen (* 1777), un Diedrich August von Wardenburg (1. Oktober 1776–21. Juli 1856) in Toftlund boren un an’n 18. August in Hadersleben döfft worrn.[1]
He weer von 1852 bet 1854 de eerste Börgermeester von Bremervöör, nadem de Oort de Stadtrechten kregen hett.
Dat Amt as Börgermeester hett he wedder afgeven, as he to’n Guvernör un Optrecker von’n Arvgroothartog Karl August von Sassen-Weimar-Iesenack beropen worrn is.[2]
Later weer he Legatschoonsraad, is 1862 Gehemen Legatschoonsraad worrn un weer toletzt Gehemen Staatsraad.[3] He weer ok Ridder von’n Johanniterorden un hett 1870 dat Ieserne Krüüz an’t witte Band kregen.[4]
Von Wardenburg hett an’n 24. Mai 1859 Marie Amalie Friederikke Louise „Annie“ von Beulwitz (11. Dezember 1826–9. März 1890) freet.[5] Na’n Dood von siene eerste Fro hett he in twete Eh an’n 17. Oktober 1892 Marie Dorothea Therese Caroline Bertha Sofie von Bibra (* 11. Juni 1856) freet.[5]
