Franz Rehling

Franz Rehling (* 21. Januar 1892 in Freeborg; † 26. Januar 1973) weer en düütschen Politiker.

Rehling is 1892 in Freeborg boren un weer dor op de Rekterschool. He güng denn na de Bogewarkschool Buxthu un hett dor Mürgermeester lehrt. 1928 is he Bövermeester von de Bogewarken-Innung worrn. Över 50 Johr lang weer he vereedigten Schätzer bi de Landschopliche Brandkass un lange Johren Bisitter von de Meesterprüfungskommission un Vörsitter von de Gesellenprüfungskommission. 13 Johr lang hett he as Fachlehrer an de Beroopsschool Keden Ünnerricht geven.

1924 is Rehling Maat von’n Kreisraad von’n Kreis Keden worrn un dat bet 1932 bleven. In de Tied von’n Tweten Weltkrieg is he Börgermeester von Freeborg worrn. Na’n Krieg hebbt de Briten 1945 em ut dat Amt nahmen, aver 1947 is he denn wedder Börgermeester worrn. Dat is he bet 1972 bleven, as he nich wedder Kannedaat för de Wahl weer, vonwegen sien Öller. Von 1946 bet 1972 weer Rehling in’n Vörstand von’n Neddersassischen Gemeendag, Afdeel Stood.

Rehling weer von 1930 bet 1971 Kreisschüttenmeester un von 1958 bet 1972 Kummandör von de Freebörger Schüttengill von 1598.

1956 is Rehling Ehrenmeester von de Bogewarken-Innung worrn un 1972 Ehrenbörger von Freeborg.

Literatur

• 825 Jahre Flecken Freiburg/Elbe 1154-1979. Festschrift, Freeborg 1983, S. 52f.