Franz Jacob

Sonnerbreefmark to Ehren vun Franz Jacob (DDR 1964)

Franz Jacob (* 9. August 1906 in Hamborg; † 18. September 1944 in‘t Tuchthuus Brannenborg) weer en düütsch kommunistisch Politiker un Wedderstandskämper tegen den Natschonalsozialismus.

Leven

Jacob weer Maschienslosser vun Berop un is 1920 de SAJ bitreden. 1922 is he to de SPD wesselt un 1925 de KPD bitreden. Af 1928 hett he hööftberoplich för den KPD-Bezirk Wasserkante arbeit un weer siet 1931 ok Liddmaat vun de Bezirksleitung. In‘ April 1932 wurr he för de KPD as jüngst Liddmaat in de Hamborgsch Börgerschap wählt. Midden 1933 wurr he vun de Nazis in Berlin verhaft un bit 1940 in dat KZ Sachsenhausen insperrt. Nahdem he entlaaten wurrn weer, organiseer he 1941 tonächst in Hamborg mit Bernhard Bästlein un Robert Abshagen en kommunistisch Wedderstandsgrupp (Bästlein-Jacob-Abshagen-Grupp), 1943 en wiedere in Berlin (tosommen mit Bästlein un Anton Saefkow). Letztere gull tietwies as Operative Leitung vun de KPD in Düütschland. In April 1944 nehm Adolf Reichwein Kuntakt to Saefkow up un knütt de Verbinnen tüschen KPD un den Verschwörern vun den 20. Juli 1944. Dat keem to en Drapen vun de Kommunisten mit Reichwein un Julius Leber as ok to en wieder Drapen blots mit Reichwein. De Gestapo kreeg dat aber gau spitz un hebbt all Bedeeligten, dorünner ok Jacob, verhaft. Nah den 20. Juli 1944 wurr Franz in dat Tuchthuus Brannenborg henricht.

Siet Dezember 1941 weer he mit Katharina Jacob verheiraadt, de he all ut sien Tiet bi de KJVD kennen dee.

Jacobs Steefdochter Ursel Hochmuth forscht siet Johrteinten to’n Wedderstand tegen den Natschoonalsozialismus.

Ehrungen

• En Stolpersteen in de Jarresstraße 21
• In Berlin-Lichtenberg drocht en Straat sien Naam.

Literatur

• Ursula Puls: Die Bästlein-Jacob-Abshagen-Gruppe. Berlin 1959.
• Ursel Hochmuth: Widerstandsorganisation Bästlein-Jacob-Abshagen. In: Streiflichter aus dem Hamburger Widerstand 1933 - 1945. Frankfurt a. M. 1969.
• Frank Müller: Mitglieder der Bürgerschaft. Opfer totalitärer Verfolgung. 2. överarbeit un ergänzt Uplaag. Hamborg 1995, S. 47–50.

Weblenken

• Die Bästlein-Jacobs-Abshagen Gruppe - Ein Beispiel des kommunistischen Widerstands in Hamburg im „Dritten Reich", vun der Hamborger Historikerin Kathleen Marowsky - up unter-hamburg.de
• Jacob in de Katalog vun de Deutsche Nationalbibliothek
• Personennaamdatei