Franz Hermann Reschke

Franz Hermann Reschke (* 17. April 1871 in Berlin; † 24. August 1934 in Lümborg) weer en düütschen Verwaltungsbeamten un Maat von de DNVP.

Reschke is 1871 in Berlin boren. He hett Juristeree an de Universität Heidelberg studeert un weer dor Maat von dat Corps Rhenania. Later is he an de Universität Berlin wesselt. Na dat Staatsexamen un de Tied as Regerungsreferendar bi de Regerung in Kassel hett he sien Dr. jur. maakt. 1899 is he Regerungsassesser worrn un 1901 is he bi de Regerung in Posen anfungen. He weer dor bi dat Oberpräsidium. 1906 is he Landraad in’n Kreis Syke worrn. Von 1910 bet 1919 weer he Maat von’n Provinziallanddag Hannover. 1917 is he för korte Tied in de Riekskoornstell beropen worrn. Von 1919 bet 1924 weer he Referent in dat prüüßsche Finanzministerium. He hett dor 1920 den Rang von en Gehemen Finanzraad un en Vortragenden Raad kregen. 1924 is he as Ministerialraad in dat prüüßsche Staatsministerium wesselt. Gliektiedig weer he bet 1932 ok prüüßschen Viez-Bevullmächtigten to’n Staatsraad. In’n Rahmen von’n Prüßenslag, mit den de prüüßsche Staatsregerung Braun-Severing afsett worrn is, is he in’n Oktober 1932 dör de Regerung Papen as Regerungspräsident in’n Regerungsbezirk Lümborg versett worrn. 1934 is he von wegen sien Öller in Rohstand gahn.

Sien Söhn Hans Reschke weer later Böverbörgermeester von Mannheim.