Flagg vun dat Saarland

De Landsflagg vun dat Saarland besteiht ut de Bundsflagg, dorup in de Midden, in den swaarten un den goldfarven Striepen övergriepend, dat Landswappen, de rechte Siet (ut Sicht vun den Ankieker, de linke Siet) to'n Mast hen wend (Hissflagg). Se kann ok as Bannerflagg utführt ween, denn sünd de Striepen senkrecht anordnet, dat Wappen steiht uprecht, de rechte Siet (ut Sicht vun den Ankieker de linke Siet) to'n swaarten Striepen hen wend.

Flagg vun dat Saarland • Siedenverhältnis   3:5

Bedüüden un Gebruuk

Standarte vun den Präsidenten
Siedenverhältnis   1:1

Luut de saarländsch Verfaaten sünd siet 1957 de Landsfarven Swaart-Root-Gold. Disse Kombinatschoon wurr nah den Biträe vun dat Saarland to de Bundsrepubliek Düütschland wählt, um demonstrativ up de Togehörigkeit vun dat Saarland to Düütschland hentowiesen.

Gebruuk

Ofschons de Flagg dat Landswappen enthollen deiht, dröfft de Landflagg vun jeden Landsbörger bruukt wurrn (in' Gegensatz to anner Landsflaggen mit Wappen as etwa Berlin oder Baden-Württemberg).

Standarte

De Landdagspräsident un de Ministerpräsident hemm dat Recht, to besünners Anlässen hör Fohrtüüch mit en eegen Standarte („Autoflagge“) to smücken. De Minister un de Leiden vun staatlich Behörden dröfft ebenfalls Autostandarten bruuken, de stellen aber lüttgere Versionen vun de Landsflagg dor(Minister: 25x25 cm; Behördenchefs: 18x25cm).

Olt Landsflaggen

Flagg vun dat Saarrebeet 1919–1935
Siedenverhältnis   2:3

1919–1935

Nah dat Aftrennen vun dat „Saarrebeet“ vun dat Düütsch Riek dör de Vörschriften vun den Versailler Verdrag bestunn de Landsflagg ut en blau-witt-swaart Trikolore. Dat sünd sowohl de Farven vun de beid ehmalgen Staaten Preußen (swaart-witt) un Bayern (witt-blau), ut Deelen vun deren Rebeeden dat Saarrebeet bild wurr, as ok ut de wesentlichen Farven vun dat saarländsch Landswappen van 1919.

Flagge des Saarlandes 1947–1956
Siedenverhältnis.   (4+2+4) : (5+2+8) = 2:3

1947–1956

To Tieden vun de Unafhängigkeit nah den Tweeten Weltkrieg bestunn de Flagg vun dat Saarland ut en sülvern (witt) skandinaavsch Krüüz, de Ünnergrund to'n Mast hen blau, to de anner Siet hen root (also de Farven vun Frankriek up Nahdruck vun dat Land).

Literatur

• Kurt Hoppstädter: Die Wappen des Saarlandes. Saarbrücken 1953.
• Hermann Lehne, Horst Kohler: Wappen des Saarlandes. Landes- und Kommunalwappen. Saarbrücken 1981.