Flagg vun Togo

Flagg vun Togo

De Flagg vun Togo in en Proportschoon vun 1:1,618 (oder 500:809) keem bi en Flaggenwettstriet rut. De Winner Paul Ahyi (1930-2010) un en wiedere Landsmann hebbt mit Afsicht de panafrikaansch Farven wählt. De Flagg wurr offiziell an’ 27. April 1960 hisst.

Beschrieven

Natschonalflagg vun Togo bi de Footballweltmeesterschap 2006 in Düütschland

Gröön steiht för de Hapen un de Landweertschap vun dat Land, Geel symboliseert den Bargbo un de Gloov an de Arbeit as materiellen, moralischen un geistigen Fortschritt vun de Natschoon un Root gellt as Farv för de Nächstenleev, de Trüe un de Leev. De witt Steern symboliseert de Reinheit un sall all Bürger doran erinnern, dat se sück de Unafhängigkeit vun hör Natschoon wördig wiesen.

De fief horizontaal Striepen, vergliekbor mit fief Fingers vun en Hand, staht för gemeensam Tatkraft vun de Bevölkerung vun Togo to’n Överwinnen vun hüütige Hinnern. De wesseln Farven stellen bito de Völfältigkeit vun dat togoisch Volk dor, de in Eenheit leven.

Historie

Wiel de düütsch Kolonialtiet weer plaant för all Kolonien en eegen Flagg intoführen. De Idee wurr aber nich ümsett. Tüschen 1956 un 1960 weer Togo en autonome Republiek ünner franzöösch Böverhoheit. Dat wurr mit de franzööschen Trikolore in de Gösch symboliseert. De bei Steerns in witt oder geel stunnen för Franzöösch-Togo un Britisch-Togoland. 1958 wurr de Trikolore ut de Flagg entfernt.

• 
  Vörslag för de Flagg för Togoland, 1914
• 
  Autonome Republiek Togo, 1957 bit 1958
• 
  Autonome Republiek Togo, 1958 bit 1960

Literatur

• Smith/Neubecker: Wappen und Flaggen aller Nationen. München 1980, ISBN 3-87045-183-1.

Weblinks

Flaggen Togos. Mehr Biller, Videos oder Audiodateien to’t Thema gifft dat bi Wikimedia Commons.

• Flags of the World - Togo (engelsch)