Findlater Castle

De Ruinen vun Findlater Castle op dat Kliff an de Pielküst

Findlater Castle is en Borgruin in’n Aberdeenshiree, Schottland, dicht bi dat Dörp Sandend twüschen de Öörd Cullen un Portsoy. De Överresten vun de Fastenanlaag, de vundaag noch to sehn sünd, gaht torüch op den Ümbo vun Johr 1455.

Geografie

Westsiet vun de Fasten mit Resten vun de Gewölven

De Borgruin liggt an de Noordküst vun Aberdeenshire an’n Moray Firth op en ruchweg 15 m hogen Felsen, dat vun en pielwannigen Kliffküst ümgeven is, de sülvst bit to 27 m hooch is. Dat licht vörlagerte Kliff is över en piele, unregelmatige Landbrüch mit dat Fastland verbunnen, man an twee Steeden is de ünnerbroken. De weern fröher vun en Brüch överspannt. De drange Togang weer de Grund, dat blots man Lüüd to Foot in de Borg kamen künnen. Op dat Fastland geev dat dorüm en Vörplatz, de to de Borg mit to höört hett.

Dat Hööfthuus vun de Fasten is in de Westwand rinboot worrn. De Hööfteven keem dorbi so to liggen, dat se baven op den Fels opliggt, man dorvun is hüüt nich mehr veel to sehn, de Muern sünd meist all afdragen worrn. Dorünner gifft dat aver noch twee wietere Even, de en wölvte Bostruktur opwiesen doot. De sünd to’n Deel noch goot instand.

De Felsen in de Ümgegend bargt veel Quarz. De Naam vun de Fasten „Findlater“ is afleidt vun dat ooltnordischen Wöör fyn „witt“ un leitr „Kliff“.

Historie

De Gewölven vun de ünneren Even vun binnen

De öllsten histoorschen Opteken, de vunddag noch vun de Fasten snacken doot, gaht torüch bit in dat Johr 1246. König Alexander III. hett de Anlaag in de 1260er Johren instand setten laten, wieldat he vermodt weer, dat de norweegsch König Haakon IV. bi em infallen wull. De Fasten füll in de Hand vun de Wikingers un weer en Tiet lang vun jem besett.

Wat vundaag vun de Ruin över is, geiht torüch op dat Johr 1455, as de Borg dör Walter Ogilvy of Auchlevin nee’ opboot un ümboot weer. He harr sik vun König Jakob II. Verlööf geven laten, dat he dat Bowark faster un starker maken dröff. Üm dat Johr 1560 is Aver Besitt vun de Familie Ogily an de Familie Gordon fallen, wat to en böse Fehd twüschen de beiden Familien föhrt hett. Alexander Ogilvy hett sien Söhn dat Arv vörenthollen un töög an sien Steed Sir John Gordon, den drütten Söhn vun’n Earl of Huntley, vör.

In disse unsekeren Tieten geev dat mächtige Lords, de mit’enanner in’n Wettstriet dorüm legen, dat Schiksal vun Schottland in de Hand to nehmen. De Gordons hebbt in’t Johr 1562 rebelleert un hellen Findlater Castle gegen de Lüüd vun Königin Maria Stuart. Man, de Rebellion weer nich vun lange Duer: An’n 28. Oktober 1562 weer de Gordons in de Slacht vun Corrichie vernichtend slahn. De Earl of Huntly is op’t Slacht feld dood bleven und Sir John weer inspaart un dree Daag later in’n Biwesen vun Königin Maria Stuart un ehrn Halfbroder, den Earl of Moray, ’n Kopp körter maakt.

Findlater Castle is dorna torüchgeven worrn an de Ogilvies, weer aver man Mitt vun’t 16. Johrhunnert opletzt ganz opgeven, wieldat de Familie ’n ne’en Sitt in Cullen boen laten harrn.

Born

• Vör Oort utstellte Tafel mit histoorschen Överblick.

Websteden

Findlater Castle. Mehr Biller, Videos oder Audiodateien to’t Thema gifft dat bi Wikimedia Commons.