Faslamfloot 1625

Vun Wikipedia
Zur Navigation springen Zur Suche springen

De Faslamfloot oder ok Iesfloot weer en swore Stormfloot in de Noordsee, bi de in de Nacht von’n 25. op’n 26. Februar 1625 vele Lüüd doodbleven sünd.

En starken Noordwest-Wind hett dat Water in de Düütsche Bucht drückt, dat de Flood to en Stormflood oplopen is. Dat Water hett ok veel Ies gegen de Küst drückt, dorüm is de Flood woll ok Iesflood nöömt worrn. Toglieks geev dat Neemaand un en Sünnverdüüstern.

Meist ganz Noordstrand un Pellworm stünnen ünner Water, blots de Niekoog nich. Op Pellworm sünd 16 Lüüd verdrunken un in de Köög 10. Disse Schadens hebbt dor ok mit to bidragen, dat Noordstrand bi de Burchardiflood 1634 denn ganz uteneenreten worrn is. Jüstso is Eiderstedt – twee oder dree Köög utnahmen – överswemmt worrn. In Westerhever sünd 13 Menschen verdrunken un 16 Hüüs von Water un Ies ümreten worrn. In Lunnenbarg sünd söven Minschen verdrunken. In de Neegd bi Padelack is de Middeldiek braken un dat Water is na Rödemis un Schwabstedt flaten. In de Hattstedtermarsch un in’n Porrenkoog is dat Water dör de Sielen dörbraken. Ok in Dithmaschen, Bruunsbüddel, Marn, Eddelak un Büsum hett dat grote Schadens geven.[1]

In Hamborg stünn dat Water op’n Hoppenmarkt, dat een dor mit’n Boot föhren kunn, un bi de St.-Katharinen-Kark sünd op’n Karkhoff de Knaken hoogspöölt. Ok de Kooplüüd in Hamborg harrn groten Schadens, as de Packhüüs un Kellers vulllopen sünd, dat de Woren verdarven deen.[2][1]

In Land Wusten is de Hälft von’n Neefeller Diek wegreten worrn.[3]

In dat Wangerland, ünner annern in Minsen un Schillig, stünn dat Water veer Weken lang mannshoog in’t Land. De Diek müss von Horumersiel bet na dat Crildumer Siel trüggnahmen warrn. Bi Schillig sünd dörteihn Hektar Land an de See verloren gahn, in’t Wangerland sogor 83 Hektar. Bi Dauensfeld is de Diek von 1551 wedder opgeven worrn.[4]

Ok in Oostfreesland, Ollnborg un Oolland hett dat brakene Dieken un grote Schadens geven un an de Jade un de Werser sünd veel Rebeden utdiekt worrn.[5] Ok de Slüsen vun Bullenhuus sünd tweigahn.

Literatur[ännern | Bornkood ännern]

  • Johann Risler: Wasserfluth. Das ist: Eine Christliche unnd auß Gottes Wordt gegründete Wasser Predigt: darin gehandelt wird von der grossen Wasserfluth welche dieses 1625. Jahrs den 26. Februarij auß der WestSee ist auffgestiegen und an der Elbe mercklichen und außsprechlichen Schaden gethan. Wolder, Hamborg 1625

Footnoten[ännern | Bornkood ännern]

  1. a b Happel, Eberhard Werner: Straff- und Unglücks Chronick, Hamborg 1682, S. 10ff
  2. Die große Helgoländer Chronik (Bolzendahlsche Chronik) 761-1723.
  3. Der Deichschutz im Amte Ritzebüttel. Döser Diekkollegium, 1926
  4. Dede Jeverliste
  5. Sturmfluten an der Nordsee ab dem Jahr 838 Sturmflut – wat geiht mi dat an?, op shz.de