Etymologie
De Etymologie (latiensch etymologia, kümmt aver ut dat Greeksche) seggt di, woneem en Woort oder inne Spraakwetenschop ok en Morphem vun kümmt.
To'n Bispill de Trecker. De kümmt vun dat plattdüütsche (un nedderlannsche) Woord trecken / trekken. En Trecker is een oder ok wat, de oder dat wat treckt. Dat Woord trecken hett en olen indogermanschen Stamm:
- neddersassisch: trecken
- ooltnedderlandsch: trecken
- neenedderlandsch: trekken
- norweegsch: trekke
- swedsch: träcka/draga
- latiensch: trahere (dor kümmt Traktor vun).
- däänsch: trække
wieder af, obers ok tohöörig sünd
- ingelsch: to draw. Trekking un trigger kümmt ok vun trahere/trecken.
- hoochdüütsch: drehen/tragen/ziehen
De plattdüütsche Etymologie is vun Woord to Woord ünnerscheedlich. En grooten Deel vun de Wöör kümmt ut dat ole Sassisch. Dorüm gifft dat veele Wöör, de verwandt sünd mit dat Ingelsche, Nedderlandsche un Hoochdüütsche. Un von düsse Wöör sünd 'n Slag gemeen Arv vun de olen Germanen. Dorüm sünd sik ok Plattdüütsch, Däänsch, Sweedsch un Ieslandsch ähnlich. Un wedder anner sünd sogor dorto verwandt mit de romanschen un slavschen Spraaken, vun wegen dat se en ole indogermansche Woddel hebbt.
Anner Wöör sünd as Lehnwöör later tokamen, Bispeel sünd
- de Buddel (Boddel / Butallje). De kümmt ut dat ole franzöösche botele un is över dat ingelsche botel (middelingelsch) un bottle in dat Plattdüütsche kamen. Dat franzöösche Woord kümmt wedder ut dat Latiensche butticula un buttis. Denn is dat Woord noch en tweetet Mol kamen, un twors in de Franzosentied ünner Napoleon Bonaparte. Ut dat niegere franzeusche „bouteille“ is denn de „Butallje“ woorn.
- Tschüss un Atschüss. De kemen vun dat spaansche „Adios“ över de Seelüü in uns Spraak rin.