Ernst Penner

Ernst Penner (* 16. Juli 1883 in Paskallwen; † 26. November 1940 in Königsberg) weer en düütschen Politiker von de NSDAP.

Penner is 1883 in Paskallwen boren. Na de Middelschool in Tilsit is he von 1898 bet 1900 an de Ünneroffzeersvörschool Weilburg un von 1900 bet 1902 an de Ünneroffzeersschool Weißenfels utbillt worrn.

Von 1902 bet 1919 weer Penner Soldat bi dat Infanterie-Regiment Nr. 43, mit dat he von 1914 bet 1918 an’n Eersten Weltkrieg deelnahmen hett. In’n Krieg is he mit dat Ieserne Krüüz II. Klass un mit dat Verwunntenafteken uttekent worrn.

Von’n 29. Oktober 1919 bet 29. Mai 1933 weer Penner Landsböversekretär bi de Provinzialverwaltung in Oostprüßen. To’n 28. Mai 1933 hett he vertredungswies dat Amt as Landraad von’n Kreis Labiau övernahmen. Von’n 1. November bet 26. Dezember 1933 hett he düsse Opgaav denn kommissarsch daan, bevör he an’n 27. Dezember 1933 offiziell Landraad worrn is.

As Maat von de NSDAP (Matennummer 19.247) harr Penner von de Midd von de Johren 1920 af an en Reeg Posten in de Partei: von’n 25. September 1925 bet 31. Dezember 1925 weer he Propagandaleiter un denn bet 15. September 1928 Oortsgruppenkassenwart von de Oortsgrupp Königsbarg. An’n 16. September 1928 is he Goschatzmeester von’n Go Oostprüßen worrn. Tosätzlich hett he an’n 1. September 1929 de Opgaven as Kreisleiter von de Kreise Königsbarg-Stadt, Königsbarg-Land un Fischhausen övernahmen, wat he bet to’n 30. April 1930 bleven is.

Von’n 20. April 1932 bet 14. Oktober 1933 weer Penner Afornten in’n Prüüßschen Landdag. In’n März 1935 is he för den Afornten Max Stülpner in’n Rieksdag narückt, in den he bet to sien Dood 1940 den Rieksdagswahlkreis Oostprüßen 1 vertreden hett. Na sien Dood hett Erich Post sien Mandaat övernahmen.

Siet Januar 1935 weer Penner ok Maat von’n prüüßschen Provinzialraad von de Provinz Oostprüßen.

Penner hett an’n 4. Oktober 1909 Meta Broschke freet. De beiden harrn den Söhn Paul.