Engelsch Buurnopstand

Vun Wikipedia

De Engelsche Buurnopstand (engelsch Peasants’ Revolt) weer en Opstand vun engelsche Buurn in’t Johr 1381.

To de Anföhrers hören John Ball, Wat Tyler un Jack Straw.

Johann vun Gent harr 1381 ene Koppstüer vun een Schilling inföhrt. He bruuk Geld in’e Kass, vun wegen den düren Krieg vun hunnert Johren. Dat weer en recht grote Summ to de Tiet. Dat müchen de Buurn nu gor nich mitmaken. In’n Juni hebbt sik twee Gruppen vun Buurn, een ut Richt Kent ünner Wat Tyler, de anner ut Richt Essex, op’n Weg na London maakt. An’n 12. Juni kemen de ut Kent in Blackheath an. Dor heel de Preester un Lollard John Ball en grote Predigt, in de he anföhr, dat na Gott sien Plaan nüms beter wesen schall as de annern un de Adligen vör Gott jüst so hooch staht as de Buurn. Den nächsten Dag sünd de Buurn över de Brüch vun London in de Stadt tagen. De twete Grupp ut Essex is na Stepney tagen. In’e Stadt hebbt se en poor Hüüs vun’n König un siene Getroen (to’n Bispeel den Savoy-Palast vun Johann vun Gent) angrepen un an’n 14. Juni den König Richard II. en List vun Saken geven, de se foddern dein. De König schull welke vun siene Ministers aflohnen un de Liefegenen schullen free wesen. En annere Grupp hett den Tower angrepen, in den sik ünner annern de Lordkanzler Simon Sudbury un de Lordschatzmeester trüchtagen harrn. De hebbt se beid opknüppt.

Richard II. hett denn Reformen tostimmt. An’n 15. Juni schull dat Verhanneln in Smithfield wiedergahn, doch William Walworth, de Lordbörgermeester vun London, hett in’n Striet Wat Tyler üm’e Siet bröcht. Dat hett de Opstännigen in Opruhr un Dörenanner versett, un so kunnen se sik gegen den Angreep vun de Königslüüd, de nu folg, nich so recht to Wehr setten. Ok John Ball is denn dorbi doodbleven, un dor weer dat denn meist ut mit de Moral vun de Opstännigen. De Reformen, de de König toseggt harr, hett he nu gau wedder trüchnahmen.

De Dichter John Gower hett över den Opstand en lang Riemwark schreven, de Vox Clamantis. He stell sik aver gor nich op de Siet vun de Buurn, nee, he segg sogor, dat de Buurn ehr Opstand vun’n Antichrist keem. Ok Jean Froissart schrievt in siene Kröönken (Chroniques) över den Opstand.