Emile Ardolino
Emile Ardolino (* 9. Mai 1943 in Maspeth, New York, USA; † 20. November 1993 in Bel Air, Kalifornien, USA) weer en US-amerikanschen Filmspeelbaas, Filmproduzent, Filmeditor un Theaterschauspeler.
Leven un Wark
[ännern | Bornkood ännern]Ardolina is de Söhn vun de italienschen Inwannerers Emilio un Ester Ardolinno. Boren weer he in en Vöroort vun Queens. Sien Vadder weer to de Tiet vun sien Geboort 54 Johren ollt un is 1949 storven.
Sien Loopbahn füng he as Schauspeler an’n Broadway an. Man, he is kort dorop achter de Kamera wesselt. To sien Fröhwark tellt vör allen Dokumentatschonen, de sik mit de Historie un de Entwickeln vun’t Danzen utenannersett. He hett 1983 to’n Bispeel den Dokumentarfilm He Makes Me Feel Like Dancin’ mit Jacques d’Amboise as Hööftdorsteller. In den Film warrt en Schoolmeester bi’n Danzünnerricht mit New Yorker Kinner wiest. Ardolino is för dissen Film 1984 mit den Oscar in de Kategorie Best Dokumentarfilm uttekent worrn.
He hett ok Bühnenstücken inszeneert as to’n Bispeel Jesus Christ Superstar oder Oh! Calcutta!. För dat letzte Stück hett he en Obie Award kregen. Enn vun de 1980er Johren is Ardolino to’n Speelfilm wesselt. Sien bekanntesten Film hett he 1987 mit den beropenen Danzfilm Dirty Dancing maakt. En wieteren Hööchpunkt vun sien krote Loopbahn weer de 1992 produzeerte Filmkummedie Sister Act.
Emile Ardolino is apen mit sien Homosexualität ümgahn. He hett sik mit HIV ansteken un is in’t Öller vun föfftig Johren in Naklapp vun en HIV/AIDSAIDS-Krankheit doodbleven. He liggt blangen sien Öllern – sien Mudder is 1975 storven wesen – in New York begraaven.
Filmografie
[ännern | Bornkood ännern]| Johr | Titel | Funkschoon |
|---|---|---|
| 1976 | Great Performances: Dance in America, Feernsehreeg | Speelbaas |
| 1979 | Baryshnikov at the White House, Feernsehn | Speelbaas Produzent |
| 1979 | When Hell Freezes Over, I’ll Skate, Feernsehn | Speelbaas Produzent |
| 1982 | A Midsummer Night’s Dream, Feernsehn | Speelbaas |
| 1983 | He Makes Me Feel Like Dancin’ | Speelbaas |
| 1986 | The Rise and Rise of Daniel Rocket, Feernsehn | Speelbaas |
| 1987 | Dirty Dancing | Speelbaas |
| 1989 | Chances Are dt.: Ein himmlischer Liebhaber |
Speelbaas |
| 1990 | 3 Men and a Little Lady dt.: Drei Männer und eine kleine Lady |
Speelbaas |
| 1992 | Sister Act dt.: Sister Act – Eine himmlische Karriere |
Speelbaas |
| 1993 | The Nutcracker dt.: George Balanchines „Der Nußknacker“ |
Speelbaas |
| 1993 | Gypsy, Feernsehn dt.: Bette Midler’s Gypsy |
Speelbaas Produzent |
Utteken
[ännern | Bornkood ännern]Emile Ardolino hett för sien Wark tosamen söven Utteken wunnen. För twintig wietere weer he nomineert. Wunnen hett he:
- 1979: den Emmy in de Kategorie Rutragen klassisch Programm in de Dorstellen Künst för Great Performances: Dance in America.
- 1982: den DGA Award in de Kategorie Rutragen Leistung as Speelball, Musical/Varietee för Great Performances: Dance in America.
- 1984: den Oscar in de Kategorie Best Dokumentarfilm för He Makes Me Feel Like Dancin’.
- 1984: den Emmy in de Kategorie Rutragen Kinnerprogramm för He Makes Me Feel Like Dancin’.
- 1984: den Emmy in de Kategorie Rutragen Enkeltleistung – informeeren Programmgestalten för He Makes Me Feel Like Dancin’.
- 1988: den Amanda in de Kategorie Best utlännsch Speelfilm för Dirty Dancing.
- 1988: den Independent Spirit Award in de Kategorie Best eerste Speelfilm för Dirty Dancing.
Weblenken
[ännern | Bornkood ännern]- Emile Ardolino in de Internet Movie Database (engelsch)