Edmund Percival Hillary
Sir Edmund Percival Hillary, KG, KBE (* 20. Juli 1919 in Auckland; † 11. Januar 2008 ok dor) weer en niegseelännsch Bargstieger. Tosommen mit de Sherpa-Bargstieger Tenzing Norgay is he an’ 29. Mai 1953 as de Eerste op den Tipp vun den Mount Everest stegen, den hööchsten Barg up de Eer.
Leven
[ännern | Bornkood ännern]Hillary wurr as tweet vun dree Kinner vun Percival Augustus Hillary un de sien Fru Gertrude Hillary, boren Clark, boren un gung in Auckland in de School, af twalf Johren in de beropen Auckland Grammar School. Dat Bargstiegen hett he as Kind in de Niegseelännsch Alpen lehrt. Twee Johr lang hett he de Universität vun Auckland besöcht, bevör he, as sien Vader ok, Imker wurr. In' Tweeten Weltkrieg weer he Navigator bi de Royal New Zealand Air Force. 1948 hett he tosommen mit Harry Ayres den Mount Cook eerstmals över den Süüdgrat besteegen.
