Driefgas
En Driefgas (oder Drievgas) is allgemeen en Gas dat dör Druck komprimeert un verfletigt worrn is un denn tomeist in en Druckluftbuddel oder Spröhdoos ünner Druck affüllt warrt. Dat is dorvör goot, en Stoff, de in de Spröhdoos affült is, dör den egen Druck vun’t Driefgas wedder ut de Doos rutrokriegen. Dat künnt verscheeen Saken wesen. Fröher weern in Spröhdosen t. B. Hoorspröhmiddel oder Deodorant bannig verbreedt.
Driefgasen warrt insett as Komponenten in Spröhdosen, as Middel to’n Opschüümen bi Levensmiddel oder op’n Bo bi Boschuum oder bi Verbrennensvörgäng (Druckgas). Dat Driefgas schall aver dorbi keen cheemsch Reakschoon mit annere Stoffen in de Spröhdoos oder Gasbuddel maken. Enige vun de bekannsten Drievgasen sünd de FCKW (t. B. Trichlorfluormethan (CCl3F) oder Dichlordifluormethan (CCl2F2)), Kohlenwaterstoffen (t. B. Propan (C3H8) oder Butan (C4H10)), Dimethylether (C2H6O), Kohlenstoffdioxid, Stickstoff oder Luft.
Driefgasen, de to’n Opschüümen in Levensmiddel tosett warrt, tellt as Levensmiddeltosatzstoffen. Dat sünd vör allen:
- Kohlenstoffdioxid CO2, vör allen in’t Drinken („Kohlensüür“).
- Distickstoffoxid N2O, t. B. för Slagrahm („Lachgas“)
- Stickstoff N2, t. B. vun’t irische Beer Guinness bekannt.
- Suerstoff O2
Driefgasen warrt ok verwennt to’n Opschüümen vun lockere cremige Levensmiddel as Frischkees oder Iescreme. Dordör sütt dat na’n beten wat mehr ut, un is ok bi deepe Temperaturen beter in Portschonen to deelen.