Douglass Cecil North

Vun Wikipedia
Zur Navigation springen Zur Suche springen

Douglass Cecil North (* 5. November 1920 in Cambridge, Massachusetts; † 23. November 2015 in Benzonia, Michigan) weer en US-amerikaansch Wertschapswetenschapler un Wertschapstheoretiker. He kreeg 1993 tosommen mit Robert William Fogel den Nobelpries för Wertschapswetenschapen för hör Erneeern vun de wertschapsgeschichtlich Forschen dör Anwennen vun ökonoomsch Theorie un quantitativ Methoden (Cliometrie) um wertschaplichen un institutschonellen Wannel to verkloren. Togliek stell Douglass North mit sien Analysen vun den institutschonellen Wannel en wichtigen Grundpieler vun klassisch un neoklassisch ökonoomsch Theorien – nämelk de Theorie vun de ratschonal Entscheeden – in Fraag.

Leven[ännern | Bornkood ännern]

Douglass Cecil North wurr 1920 in Cambridge (Massachusetts) as Söhn vun en Levensversekerungs-Manager boren un is in Ottawa, Lausanne, New York un Connecticut upwussen. Nahdem sien Familie nah San Francisco trucken weer, studeer North an de University of California (Berkeley) Politikwetenschap, Philosophie un Wertschapswetenschapen. 1942 hett he sien Studium mit den Bachelor of Arts afslooten un is as erklärt Kriegsgegner de US-Hannelsmarine (to'n Transport vun Truppen un Utrüsten) bitreeden. Van 1944 bit to sien Utträe 1946 hett he ünner annern an de Marineschool in Alameda Astronoomsch Navigatschoon ünnerricht.

Nah sien Rückkehr nah Berkeley hett he 1952 sien Doktertitel över de Geschichte vun de Levensversekerungen in de USA maakt. Nah sien eegen Seggen stunnen sien wirtschapshistorschen Betrüer de Wertschapstheorie ehrder skeptisch tegenöver, so he hör eerst in' Kuntakt mit Kollegen an de University of Washington (Seattle) näher begegnet weer, wo he sien eerst Dozentenstäe kreeg.

Nah sien eerst Artikel in dat Journal of Political Economy över Regionalökonomik un Wertschapswassdom (Location Theory and Regional Economic Growth, JPE Jg. 63, H. 3, 1955, S. 243–258) kreeg he 1956–57 de Mögelkeit an dat Forschensinstitut National Bureau of Economic Research (NBER) to arbeiten, wo he sück vör allen mit empirisch Forschungen to de Tahlenbilanz vun de Vereenigt Staaten tüschen 1790 un 1860 befaaten dee, de he in de nächst teihn Johren to dat Book The Economic Growth of the United States from 1790 to 1860 utbauen dee. Siet de fröh 1960er Johren weer North en vun de Vörrieder vun de Cliometrie, de Anwennen vun ökonoomsch Theorie un quantitativ-statistisch Methoden up wertschapshistorsch Ünnersökensgegenstände. Wiels en Utlandsjohr in Genf 1966/67 hett he sück starker de europääsch Wertschapsgeschichte towendt. Sietdem erforsch he swoorpunktmäßig de sellschopplich Strukturwandlungen, de mit Wertschapsentwicklungen inhergahn bzw. se beinflooten un mögelk maaken. Wiels disse Arbeit entwickel he so nah un nah sien Theorie vun den institutschonellen Wannel, de sück immer starker vun den Effizienz- un Rationalitätsparadigma vun de neoklassisch Sicht vun Institutschonen afwennen dee.

1983 wessel he vun de University of Washington an de rechts- un wertschapswetenschapliche Fakultät vun de Washington University in St. Louis, wo he van 1984 bit 1990 Direkter vun dat Zentrum för politische Ökonomie weer. 1992 kreeg he as eerst Wertschapshistoriker överhoopt en de för Ökonomen bedüüdenst Utteknungen, den John R. Commons-Pries, de 1965 vun de International Honors Society in Economics (sinngemäß: Internatschonale Sellschopp för Utteknungen in de Ökonomie) in't Leven ropen wurrn weer. Sien latere Forschensinteressen bedropen Eeegendomsrechte un Transaktschonskösten, de ökonoomsch Organisatschoon in de Historie, Institutschonen un ökonoomsch Entwicklung in Entwicklungslänner.

North hett as Experte bi den Copenhagen Consensus vun de Copenhagen Business School deent. North weer siet 1972 in tweet Ehe verheiraadt. Ut sien eerst Ehe harr he dree Söhns, de tüschen 1951 un 1957 boren wurrn.

Warken (Utwahl)[ännern | Bornkood ännern]

  • Institutions, Institutional Change, and Economic Performance. Cambridge University Press, Cambridge u. a. 1990 Cambridge, ISBN 0-521-39416-3 (ins Deutsche übersetzt von Monika Streissler als: Institutionen, Institutioneller Wandel und Wirtschaftsleistung (= Die Einheit der Gesellschaftswissenschaften. Bd. 76). Mohr, Tübingen 1992, ISBN 3-16-146024-3).
  • Understanding the Process of Economic Change. Princeton University Press, Princeton NJ u. a. 2005, ISBN 0-691-11805-1.

Literatur[ännern | Bornkood ännern]

  • Ingo Pies, Martin Leschke (Hrsg.): Douglass Norths ökonomische Theorie der Geschichte (= Konzepte der Gesellschaftstheorie. Bd. 15). Mohr-Siebeck, Tübingen 2009, ISBN 978-3-16-150050-3.

Weblenken[ännern | Bornkood ännern]