Diskuschoon:Bernhard Winter

Bernhard Winter , * 14.3.1871 in Neenbrook, + 6.8.1964 in Ollnborg, Kunstmaler.
Bernhard Winter hett siene Kinnertiet in Moorriem tobrocht. Dat hett em för sien ganze Leven mit ländliche Kultuur, Traditschoon, Bruukdoom un de plattdüütsche Spraak eng verbunnen. De Familje toog um na Ollnborg, un de junge Bernhard kunn dar ene högere School besöken. Siene Verbinnung mit dat Landleven aber bleef wieterhen bestahn. Ok as he naher up de Kunstakademien Dresden, Berlin, München un Düsseldorp studeerde, muss he twüschendöör ümmer wedder na Ollnborg trüggkamen un siene künstlerischen Vörstellungen up dat Heimatliche utrichten. He keem in Utstellungen ok goot mit siene annern Biller goot an, aver em sülfst gefullen de mit de heimatlichen Motive an'n besten.
Bi siene Besöken in Ollnborg keem he ok in Kontakt mit den Hoff von den Groothertog. Dat verhulp em to grode Updrääg un maakde em bekannt in dat Ollnborger Land. Mit de Tiet woor he to den Maler von de Ollnborger Sellschup. 1903 verlehnde em de Groothertog den Professorentitel, un de Ollnborger Künstlerbund wählde em to sienen eersten Vörsitter.
Professor Bernhard Winters Biller stimmt faken so genau mit de Wirklichkeit övereen, dat man annehmen kunn, dat hannel sik um Fotografien, un dat gifft jo Kritiker, de sowat nich as Kunst anerkennen wüllt. Se geeft aver ok to, dat dat ene hoge Kunst is, natuurgetrolich to malen un liekers noch wat anners darbi uttodrücken. Wat Winter up siene Biller uttodrücken verstund, dat weer t.B. de Charakter von Personen, de Stimmung von versammelte Minschen oder socke Egenaarten as Beschedenheit, Tofredenheit, Stolt un Uprichtigkeit.
Up dat Bild mit den Titel "Pfingsausflug" kannst sehn, dat en Fierdag is. Verwandte kaamt up enen Ackerwagen to Besöök. Up den Hoff is allns ornlich. Dat Bild strahlt angenähme Rauh un Stillte ut. Den Buur schient dat goot to gahn, un de Besöök is hartlich willkamen.