Diskuschoon:Amokloop in Winnenden

Seggt mi mol, wat för'n Kategorien hier passen döen...--Bolingbroke ✍ 19:01, 12. Mär 2009 (CET)

Anners wat: De Naam vun den Verbreker is bekannt. Up WP:en gifft dat al en Artikel över em. Up de Diskusschoonssiet vun WP:de warrt avers en Striet dor över föhrt, ob düsse Naam nömmt weern schall oder nich. Dorbi geiht dat um verscheden Grünn, de een dor nalesen kann. Wie seht Ji de Sake? Ik schriev eerstmol Tim K.. So steiht dat ja al in den Henwies up en Daagblatt.--Bolingbroke ✍ 19:11, 12. Mär 2009 (CET)

Dat gifft de Kategorie:Massendood an de Steed vun Amokloop. Ik finn den Begreep an sik nich so schön, vun wegen dat de nich nau noog seggt, wat all'ns dorto tellt. As Böverbegreep weer de villicht beter. Aver de Diskusschoon höört nich hier her.

De Naam... hm, ik heff dor an sik keen Menung to. Dat gifft rechtliche Bedenken, de dorgegen snackt oder ok eenfach de Fraag, wat man de Familie dormit andeit, wenn de Naam publiek maakt warrt. Ik denk, dat is för't Verstahn vun'n Artikel nich nödig, den Naam antogeven, also schaad dat nix, wenn wi em weglaat. En Artikel to den Amoklöper sülvst mööt wi seker nich hebben, meen ik. De Jung hett anners nix bereten, as dat em de Nerven dörgahn sünd. In mien Ogen warrt dorut nix vun Relevanz. --Iwoelbern ✍ 19:24, 12. Mär 2009 (CET)

Eerstmal to de Kategorie. De schall ruhig Amokloop heten. Amokloop kann denn Ünnerkategorie to Massendood wesen. Den Naam Massendood heff ik nahmen, vonwegen dat de Dood von de Lüüd bi'n Massendood vun Kanungu ja nich ganz freewillig, aver ok nich ganz unfreewillig weer. Aver en Amokloop is ja gegenöver dat, wat in Kanungu passeert is, en ganz egen Phänomen un bruukt ok en egen Kategorie.

Den Naam dee ik eerstmal weglaten. Dat is en Saak, de de Press mit de Gerichten utmaken mutt. De Press hett den Naam nu seggt un nu köönt wi töven, wat passeert. Wenn nüms vör Gericht geit, denn köönt wi em ok schrieven. Wenn een vör Gericht geit, denn hollt wi uns an dat Gericht. Wikipedia ehr Geschäft is dat nich.

En tweten Artikel to'n Amoklöper noch extra bruukt wi op gor keen Fall. Dat höört in een Artikel. --::Slomox:: >< 20:24, 12. Mär 2009 (CET)

Schützenvereen

Wat mi en beten stöört, is, dat nu överall wedder steit, dat sien Vadder in'n Schützenvereen weer un en groten Hümpel Knarren tohuus harr.

Ik bün ok in'n Schützenvereen un Schützenvereen hett eerstmal temlich wenig mit Berettas un so'n Schiet to doon. Dat gifft natürlich verscheden Formen von Schützenvereens, aver bi uns hier in'e Gegend kenn ik keeneen Vereen de mit Wapen schütt, mit de du en Amokloop maken kunnst. Mit en Kleenkaliber kriggst dat villicht hen, wenn du den richtigen Placken drippst, dat du een doodschüttst, aver denn musst du eerst maal en ne'e Patroon inleggen. En Luftgewehr hett jüst soveel Wumms, dat du dor op teihn Meter en lütt Lock in en Stück Papp rinmaakst. Dat deit gewiss hellsch weh, wenn di dor een mit drippt, aver je nadem, wat he drapen hett, büst du wohrschienlich noch jümmer fit noog, em achterhertorennen un em in'n Oors to pedden...

So'n Döösbaddels sünd dat op jeden Fall, de dor för sorgt, dat de normalen Schützenvereens nu al en Slott vör de Taschen maken mööt, wenn se mit dat Luftgewehr na't Naverdörp föhren wüllt.

Ik bün ja man ok för de Sekerheid un ik bün dor ok för, dat de Gewehren so lagert warrt, dat dor keen Kinner bigahn köönt un so. Aver jümmer wenn sowat as nu passeert, denn warrt ok bi de Schützenvereens wedder de Schruven andreit. De schullen man beten mehr Ünnerscheed maken twischen Sportwapen un Mordwapen. Wenn du 20 Schuss per Snellfüür afschüttst, denn is dat keen Sportgewehr, un en Sportgewehr döggt nix to'n Amokloop. --::Slomox:: >< 21:02, 12. Mär 2009 (CET)