Daina-Schapp

Vun Wikipedia
Zur Navigation springen Zur Suche springen

Dat Daina-Schapp (lettsch Dainu skapis) is en Archivschapp, dat Krišjānis Barons för siene Sammlung vun Dainas schapen hett. Dainas sünd lettsche Volksleder, de Barons sien Leven lang sammelt un optekent hett. Dat Daina-Schapp gellt för de Letten as Natschonalhilligdom. Dat Schapp steiht hüüt in dat Archiv för lettsche Volkskultur in Riga.

Barons hett üm un bi 150.000 Dainas tohoopsammelt. All op Karteikoorten vun 3 mal 11 Zentimeter. Toeerst harr he jem in Zigarrenkisten insorteert. Dat güng temlich gau nich mehr. Dat de Hümpel Poppeer nich dörenanner keem, hett Barons 1880 in Moskau dat Schapp in Opdrag geven. Dat hett 70 Schuven in twee Regen. Jede Schuuv hett twee mal teihn Fäcker.

Siet den 4. September 2001 steiht dat Schapp in dat Gedächtnis-vun-de-Welt-Register vun de UNESCO. Ünner Perfesser Imants Freibergs hebbt se 1998 anfungen, all Koorten in dat Schapp digital to maken. Dat schöölt denn so üm un bi 300.000 Karteikoorten wesen.

Weblenken[ännern | Bornkood ännern]