Codex Iustinianus

Vun Wikipedia
CORPUS IURIS CIVILIS ROMANI. Institutiones et Digestae. Gothofredus, 1583

De Codex Iustinianus is een vun veer Deele vun dat Wark, dat later den Naam Corpus Iuris Civilis kregen hett. En good Deel vun dat so nömmte Röömsche Recht is dor also in upschreven. Düsse Schrift is vun Kaiser Justinian I. an'n 13. Februar 528 in Updrag geven wurrn dör de Constitutio de novo codice componendo (ok Constitutio Haec nömmt). Dor hett de Kaiser in verlangt, all Gesette vun de Kaisers vör em schollen tohopenstellt weern, wenn se noch gellen döen. De Lüde, de düssen Updrag kregen harrn, hefft allerhand Vullmachten harrt un dröffen de Wetten afkörten un aktueller maken. De Kaiser weer dortieds noch nich lang in't Amt, man he harr dat dor up afsehn, de Eenheit vun dat Rechtswesen in dat Röömsche Riek in de late Antike wedder her to stellen.

Vör den Codex Iustinianus weern vun private Hand al fröher de kaiserlichen Konstitutschonen sammelt wurrn dör Gregorius (2. bit 3. Johrhunnert n. Chr., Codex Gregorianus) un Hermogenian (293-294 n. Chr., Codex Hermogenianus). Ok en amtliche Sammlung dör Theodosius II. (438 n. Chr., Codex Theodosianus) harr dat al geven.