Claudius Peters

Vun Wikipedia
Zur Navigation springen Zur Suche springen
Logo von dat Ünnernehmen

Claudius Peters (CP) is en Maschinenbo-Ünnernehmen ut Buxthu mit üm un bi 400 Lüüd in Lohn. Siet 2002 höört Claudius Peters to de Ünnernehmensgrupp Langley Holdings ut Grootbritannien.

CP stellt Lagerplätz, pneumaatsche Förderanlagen, Zementsilos, Aluminiumsilos, Klinkerköhlers, Mahlanlagen för Mineralien, Köhlen un Gips, Gipshomogeniserer un -Köhlers, Packanlagen un Schüttgoodtechnik för Scheep, Aluminium un Köhlen her.

Historie[ännern | Bornkood ännern]

Dat Ünnernehmen is 1906 von Claudius Peters (1875-1957) in Hamborg grünnt worrn.[1] Dat weer toeerst europääschen Generalvertreder för Möhlen un Pumpen för de Zementindustrie von de Firma Fuller Lehigh. 1920 tüht CP mit siene Büros in’n Wallhoff an’n Klockegeterwall.[1] 1933 is dat Ünnernehmen en Aktiensellschop worrn.[1] To de Andeelseegners hett denn ok de Babcock-Grupp höört.[1] 1952 hett dat Ünnernehmen en Fabrik in de Liebigstraat in Billbrook apenmaakt un 1954 de Maschinenfabrik Eest in Buxthu.[1] 1966 is CP in Bürorüüm in de City Noord ümtagen.[1] 1975 is ut de Maschinenfabrik Eest de Claudius Peters Este GmbH worrn un en groten Deel von de Produkschoon is von Hamborg na Buxthu verlagert worrn.[1] 1988 is dat Ünnernehmen denn kumplett von Hamborg na Buxthu leggt worrn.[1]

1980 hett Claudius Peters toeerst anfungen, ok för de Airbus Industrie Delen to boon. Dat Ünnernehmen boot vondaag Stringers för de Airbus-Flegers.[1] 1994 hett CP as Deel von de Babcock-Grupp den ne’en Naam Babcock Materials Handling AG kregen, de aver 1996 al wedder op BMH Claudius Peters AG ännert worrn is.[1] 1999 is ut de AG denn en GmbH worrn.[1] 2002 hett de Grupp Langley Holdings dat Ünnernehmen övernahmen.[1]

De Mitarbeidertall leeg 1939 vör’n Tweten Weltkrieg bi 34 Lüüd, is 1946 na’n Krieg aver op 23 dalgahn.[1] Al 1955 is se bet op 157 stegen.[1] 2006 hebbt för Claudius Peters in Buxthu 461 Lüüd arbeidt un op de Welt för de Claudius Peters Group üm un bi 600.[1]

Footnoten[ännern | Bornkood ännern]

  1. a b c d e f g h i j k l m n o Geschicht von Claudius Peters (engelsch)

Weblenken[ännern | Bornkood ännern]


Koordinaten:53° 28′ N, 9° 42′ O