Christoph Kolumbus
Christoph Kolumbus (* 1451 in Genua; † 20. oder 21. Mai 1506 in Valladolid) ellers Klumbumbus, wat sien plattdüütsche Ökelnaam is, Cristóbal Colón, as de Spanschen seggen un Cristoforo Colombo, as he op Italieensch heet, weer een Italiener ut Genua oder en Spanier. He wüss, dat de Eer rund is - wat de allgemeen Meenen weest is. Denn harr he överleggt, dat een denn jo na Indien ook över West seilen kann. He froog bi König Johann II. in Portugal na, man de meenen, dat de Weg langer wöör. In Spanien bi de Königin Isabella vun Kastilien harr he denn Spood. Se stell em dree Scheep to Verfögen. An'n 17. April 1492 unnerschreven se, de König Ferdinand II. un Kolumbus in Santa Fé enen Verdrag över ene Expeditschoon na Oostasien.
An'n 3. August 1492 is he denn vun den Hoben Palos na Westen schippert mit sien dree Schippen, de Santa Maria, Niña un Pinta heten harrn. He seil över de Kanarschen Inseln un denn straks nah'n Wessen.
An'n 12. Oktober güng he denn in San Salvador, wat to de Bahamas heurt, an Land. Dor harr he denn ook Lü drapen, un vun wegen dat he meen, he weer in Indien, harr he se Indianers naamt. Denn is he ook langs Kuba un Hispaniola seilt.
An'n 4. Januar 1493 is he wedder trüchseilt, man ahn de Santa Maria, de harr he op Grund sett. An'n 15. März 1493 weer he denn wedder in Spanien. Dor hebbt se em fiert un weern reinweg ut de Büx. Nich toletzt vun wegen dat Gold, wat he mitnahm harr un vun wegen de Indianers, de he fungen harr.
Dat weer de Anfang vun een Amerika-Boom, un denn sünd veele ut Europa na Amerika. Dat heet, Columbus harr Amerika entdeckt, man dat stimmt so nich, vun wegen dat de Wikingers ut Grönland al 500 Johr fröger na Amerika seilt sünd. Weer ook in Middeleuropa kunnig woorn (Adam vun Bremen), man dat harrn se al wedder vergeten. So hett Kolumbus Amerika denn to'n tweeden Mol entdeckt.
Later harr he denn noch dree Reisen maakt. De tweete gung na de Lütten Antillen, Porto Rico un Jamaika, de drüdde na Trinidad un in de Orinoco-Münn. De spaansche Kroon sett em as Stattholler in, aver siene Lüüd verklagen em bi den König un so wurr he afsett un na Spanien trüchhaalt. He kunn sik aver rechtfardigen un segel noch eenmaal wedder los. Noch ümmer soch he dat egentliche Fastland von Indien, un dittmaal nehm he von Kuba ut Kurs na Westen bit an de middelamerikaansche Küst. He harr dat woll al ahnt, dat wieter na Westen noch en Ozean överqueert weern muss, aver he fund de Dörfahrt nich .
As kranken Mann keem he in'n November 1504 trüch na Spanien. Königin Isabella weer kort vörher dood bleven un König Ferdinand weger sik, em as Vizekönig vun de updeckten Kolonien intosetten. Vereensaamt un verbittert toog Kolumbus sik na Valladolid trüch. He sturv dar twee Jahr later in den fasten Gloven, dat he den westlichen Seeweg na Indien funnen harr. Sien Verdoon leevt wieter in den Naam „Westindien“ för de middelamerikaansche Inselwelt, un de Uurinwahners vun Middel- un Südamerika weert noch vundage „Indios“ nöömt. Dat Kolumbus enen ganz neen Kontinent updeckt hett, is em sülvst nie bewusst wurrn. Eerst as Ferdinand Magellan (1519-1522) den Weg um Südamerika un dör den Pazifik na Oostasien funnen harr, kunn man sik en Bild darvun maken, wo de Eerdkugel wahrhaftig utseeg.
Kiek ok
[ännern | Bornkood ännern]Literatur
[ännern | Bornkood ännern]- Gerhard Prause: Niemand hat Kolumbus ausgelacht (op hooch)