Chottsbüren
Chottsbüren (Gottsbüren) is en Stadtdeel vun Dringelborg in den Landkreis Kassel in Noordhessen. In dat Dörp leevt 872 Inwahners.
Geographie
[ännern | Bornkood ännern]
Dat Dorp Chottsbüren liggt bi 30 km nöördlich vun de Grootstadt Kassel (Luftlinie). Dat liggt dor in den nöördlichen Deel vun den Reinhardswald, nich wiet in'n Westen vun den Langenbarg, de 424 m hooch is. Noch en beten wieder na Westen hen liggt de Holtape. Dör den Oort flutt de Fuldebäke, de later in de Holtape inmünnen deit. En Afsnitt vun de Straat vun de Werserrenaissance föhrt ok dör dat Dörp dör.
Bloß 4,5 km Luftlinie na Süüd-Süüdoosten to kümmt een na de Sababorg. Dor weert allerhand Sagen över vertellt un se warrt as dat Slott vun Dornröschen vun de Bröder Grimm ankeken.
Historie
[ännern | Bornkood ännern]Middelöller
[ännern | Bornkood ännern]Al in dat 9. Johrhunnert warrt de Oort nömmt. Dormols heet he „Buria“. Later weert ganz verscheden Naams bruukt, as Gunnesburin, Gunnesburen, Hundesburen, Godesburen. In dat Johr 1355 is to'n eersten Mol de Naam Gottsbüren to hören.
De Oort höör to den Grafen Ludolf vun Dassel siene Gemarken. He verköff dat Dörp 1272 an dat Arzbisdom Mainz. Bloß 60 Johr later hett Mainz dat Dörp dat Klooster Lippoldsbarg överlaten.
In dat Middelöller sünd allerhand Öörd in düsse Kuntreien wööst wurrn. För Chottsbüren gell dat avers nich. Dat leeg to günstig an den olen, wichtigen Hannelsweg, de dormolige „Königstraat“.
Wallfohrt
[ännern | Bornkood ännern]Chottsbüren is bekannt wurrn vunwegen dat „Wunner vun Chottsbüren“. 1329 oder 1330 güngen allerhand Geschichten üm dat Lief vun den Herrn Jesus Christus dör de Gemarken vun den Reinhardswald. Dat is vertellt wurrn, dat Christus sien doden Liev in de Hölter um Chottsbüren to funnen wurrn weer un nu in de Karken liggen scholl. De Arzbischop Balduin vun Trier geev den ok al an'n 10. Juni 1331 Verlööv to en Wallfohrt. Later is dor en Pilgerfohrt na de Hostie vun Chottsbüren vun wurrn. Düsse Pilgerfohrten geev dat bit 1399. Se bröchen in de Gegend vun dat Dörp unbannig veel Lüde un allerhand Riekdom. Mannich en Pilger is up den Weg na Santiago de Compostela glieks in Chottsbüren bleven. So bruuk he nich den langen Weg bit an dat Enne vun de dormolige Welt to maken.
In dat Dorp steiht noch de Kark, de för düsse Wallfohrten 1330 un 1331 boot wurrn is. Later in dat 14. Johrhunnert is se to en Hallenkark mit dree Scheep utboot wurrn. 1334 is den to'n Schutz för de Pilgers noch de „Tappenborg“ boot wurrn. Hüde heet düsse Borg de „Sababorg“.
Spraak
[ännern | Bornkood ännern]Chottsbüren höört to de Gemarken in Hessen, wo an un for sik Plattdüütsch snackt wurrn is. Hüdigendags warrt tomeist Hoochdüütsch snackt.