Cheondoismus

Vun Wikipedia
Flagg vun’n Cheondoismus

De Cheondoismus (koreaansch 천도교) is en koreaansche Religion. De Cheondoismus hett sien Worteln in de Donghak-Bewegung vun Choe Jeu.

De Cheondoismus hett in Süüdkorea so bi 1,13 Millionen Anhängers un 280 Tempels (Stand 2005). In Noordkorea schöölt dat so bi 2,8 Millionen wesen (Stand 2000). In Noordkorea sünd de Cheondoisten in de Cheondoistische Chongu-Partei polietsch organiseert.

Historie[ännern | Bornkood ännern]

In dat 19. Johrhunnert weer Korea en Sellschop mit en groot Scheer twischen arm un riek. Dat geev en Grupp vun rieke Landbesitters un Aadlige un en brede Mass vun arme, ünnerdrückte Buurn. Jümmer wedder gev dat Opstänn vun de Buurn. Ünner Choe Je-u hett sik ut disse untofredenen Buurn en Befreeungs-Bewegung billt, de Donghak. Se wullen de soziale Ungerechtigkeit in de Sellschop wegkriegen, hebbt sik för Minschenrechten stark maakt un sik gegen den Influss vun dat Utland in Korea utspraken. Moraalsch Hanneln un sozial Geweten weren för jem wichtige Saken. 1892 hebbt de Buurn en Buurnarmee opstellt un 1894 keem dat to’n Donghak-Opstand gegen de koreaansche Oberschicht un gegen de Japaners. Aver de Buurn kunnen sik nich dörsetten un Korea is vun de Japaners besett worrn.

In de Johren 1898 bet 1905 geev dat denn en Reform-Bewegung ünner de Donghak-Anhängers. König Gojong dee nu ok de Donghak-Idee ünnerstütten. Ünner sien Inwarken kemen Elemente vun Buddhismus un Christendom dorto un he un Son Byeong-hui hebbt veel daan, dat ut Donghak en formale Religion worrn is, de denn 1905 den ne’en Naam Cheondoismus kregen hett.