Centralia (Pennsylvanien)

Centralia is en Gemeen in’n Columbia County in Pennsylvanien, USA. Bet 1981 harr de Oort mehr as 1.000 Inwahners. Hüüt hett de Oort weniger as twintig Inwahners, vun wegen dat Minenfüer, dat siet 1962 ünner den Oort smöölt.

Historie

De Gemeen Centralia weer 1866 inricht un harr vörher al siet 1841 as Bull’s Head bestahn. De Oort weer vun Köhlabbo-Kunzernen grünnt, un wegen dat se de rieken Anthrazit-Vörkamen in de Region abboen wullen. De Abbo güng wieder bet in de 1960er Johren. De illegale Abbo vun Köhl güng ok noch bet 1982 wieder.

De mehrsten Footpadden sünd hüüt vun Gras un Kruut överwussen, de Kark hett noch elk Week en Gottsdeenst, de veer Karkhööv un de privaten Grundstücker warrt noch pleegt.

Minenfüer

Bi dat Afbrennen vun Müll in en opgevene Kuhl süüdoosten Centralia 1962 füng en Köhlader in de Neeg Füer. De Versöök dat Füer to löschen harrn kenen Spood un dat Füer breedt sik ünner den Oort ut. So brenn dat Füer ünnereerdsch de 1960er un 1970er Johren wieder. Vun wegen dat produzeerte Kohlenmonoxid un dat Schehn vun 1981, as sik ünner de Fööt vun en twölf Johr oolt Kind en Lock opdoon hett, hett sik de Staat mit den Oort utenannersett un 1984 beslaten, 40 Millionen US-Dollar för en Ümsiedlungsprojekt uttogeven. De mehrsten Inwahners sünd gegen Geld ut dat Ümsiedlungsprojekt na Mount Carmel oder Ashland ümtogen. Aver en poor Familien wullen blieven. 1992 wull Pennsylvanien de letzten Inwahners enteignen, wat na Insprook vun de Inwahners nich kumplett klapp.

Dat eenzige sichtbore Teken vun dat Füer is de Damp, de an en poor Steden süden den Oort ut de Eerd stiggt. Ok in den Deel vun de State Route 61, de in de 1990er Johren slaten woorn is, nadem grote Reten in de Asfaltdeck optreden sünd, stiggt Damp ut de Eerd. Dat Füer brennt wieder un schall dat woll noch för 100 Johren doon, denn dat gifft kene Plään, dat Füer to löschen.

Demografie

Na den Zensus vun 2000 leevt 21 Lüüd in teihn Huusholten in Centralia. In’n März 2004 weren noch 18 Lüüd in 9 Hüüs na. De Inwahnerdicht weer 2000 33,8 Inwahners op den km².

Weblenken

• CentraliaPA.com (engelsch)
• Historie vun de Centralia-Conyngham Township (engelsch)