Caspar Friedrich Renner
Caspar Friedrich Renner (* 20. März 1692 in Münnen; † 21. Mai 1772 in Bremen) weer en düütschen Verwaltungsbeamten un Dichter.
Renner is 1692 as Söhn von en Dokter in Münnen boren. He hett Juristeree an de Universitäten Jena un Halle studeert un weer von 1717 bet 1724 hannöverschen Intendant in Bremen. 1725 is he Struktuar von’n Bremer Doom worrn un 1738 Stadtvaagd in Bremen. 1760 is sien Söhn Johann Christoph Georg Renner sien Adjunkt worrn. Renner is bet to sien Dood 1772 Struktuar ween.[1]
Renner hett sik blangenbi veel mit de ole plattdüütsche Spraak uteneensett. 1711 hett he mit Reineke de Vos mit dem Koker en tweten Deel von Reynke de Vos schreven. 1732 hett he ünner den Schrieversnaam Franz Henrich Sparre mit Hennynk de Han noch en tweet Wark rutbröcht, dat in’n Stil von Reynke de Vos hollen is. In dat Vörwoord hett he so daan, as wenn he dat Stück in en ole Handschrift ut dat 16. Johrhunnert funnen harr, üm de Lüüd to narren. Eerst later is rutkamen, dat he dat sülvens schreven harr.
He hett 1724 Marianna Brown (1707–1751) freet. De beiden harrn 16 Kinner, ünner annern den Söhn Johann Christoph Georg Renner. 1752 hett he in twete Eh Augusta Friederica Maritia von Weltzien (1719–1777) freet.
Warken
[ännern | Bornkood ännern]- Reineke de Vos mit dem Koker. Frytag, Wulffenbüttel 1711
- Hennynk de Han. [Bremen] 1732
- Eine Handvoll Knittel-Gedichte. Saurmann, Bremen 1738
Literatur
[ännern | Bornkood ännern]- Ruth Hanna Lesser: Caspar Friedrich Renner, 1692-1772. Ein Beitrag zum niedersächsischen Schrifttum des 18. Jahrhunderts. H. Eichblatt, 1936