Carl Georg Barkhausen

Dr. Carl Georg Barkhausen (* 14. Februar 1848 in Bremen; † 5. November 1917 in Bremen) weer Afkaat un Börgermeester in sien Vaderstadt.

Barkhausen studeer up Afkaat in Heidelbarg, Berlin, Leipzig un Göttingen. 1870 maakde he sienen Doktor. Dor weer he in Leipzig. Nah dat Studium is he Afkaat in Bremen wurrn. Vun 1876 af an weer he ok Afkaat vun de Regeeren. 1875 is he in dat Parlament vun de Stadt, in de Börgerschup, inträden. Later hett he dor dat Amt vun den Vizepräsidenten harrt. 1879 hefft se em in den Senat wählt. He weer dor tostännig för Habens, Schipperee un Verkehr. He hett sik dorför insett, datt de Habens in Bremen un Bremerhaben utboot wurrn sünd un datt dat mit de Industrie an de ünnere Werser fudder güng.

In sien Amtstiet as Senator hett he tohopen mit sienen Kollegen Albert Gröning un mit den Forscher un tokümstigen Direktor Hugo Schauinsland dat grote Stadtmuseum för Natuurkunn, Völkerkunn un Hannelskunn upmaakt. Vundaag heet dat Överseemuseum.

Carl Barkhausen is fökener Börgermeester un Präsident vun den Senat ween (1904, 1906, 1911, 1913 un 1916).