The Brights

Vun Wikipedia
(wiederwiest vun Brights)

The Brights is en Grupp un Bewegen, wo Minschen tohöört, de en naturalistisch Weltbild hefft un up Insichten vun de Wetenschop vertroot. Lüde, de to düsse Bewegen höört, nöömt sik free vun Religion un Höhnergloven un de Ethik vun jem, un allens, wat se doot, hett siene Grundlage in en naturalitisch Weltbild.

De Begreepe bright un brightness sund 2003 upkamen as internatschonale un positive Begreepe, wo jedereener unnerkrupen kann, de en naturalistisch Weltbild hett. An un for sik höört de meisten Atheisten, Freedenkers, Sekulären Humanisten, Pantheisten un Agnostizisten hier mit to. De Begreepe sund vun de US-Amerikaners Paul Geisert un Mynga Futrell up'n Weg brocht wurrn. De Idee is dör Richard Dawkins in de Dageblöer The Guardian un Wired un dör Daniel Dennett in de New York Times bekannt maakt wurrn.

Nadem dat Woort bright in de USA för düsse Naturalisten-Bewegen bruukt wurrn is, is dor slank de Diskusschoon losgahn, of dat en passlich Woort för de Saak weer. De Kritik hett dor sien Grund in harrt, datt bright nich bloß hell bedüden deit, man ok plietsch oder klook. Dor warrt ja mit utseggt, datt en Materialisten en plietschen Fent is, unner Umstänn plietscher as een, de (an en Gott) gloven deit. De Begreep is nich översett wurrn, just vunwegen datt he siene Kraft sunnerlich ut den internatschonalen Charakter her kriggt. As Begreep, de gegen Bright över steiht, is dat Woort Super utwählt wurrn. Dat kümmt in düssen Fall vun supernatural, dat heet boven de Natur. So weert de Lüde nöömt, de an den Welt boven de Natur gloven doot.

Weblenken[ännern | Bornkood ännern]