Bremer Stadtmuskanten

Standbild vun de Muskanten an’t Bremer Raathuus

De Bremer Stadtmuskanten, dat is en Märken ut de Ümgegend vun Bremen. Dat hannelt vun veer Deerten, de oolt sünd un vun jemehr Besitters nich mehr bruukt warrt. Se besluten as Muskanten na Bremen to gahn.

De bekanntste Version vun dat Märken is de na de Bröder Grimm. Dat is vun’n Typ Aarne-Thompson 130 (Deerten in’t Exil).

So geiht dat Märken

De Esel, de bi’n Möller de Säck sleppen deit, is oolt un kann de Säck nich mehr bikamen. So will he denn utneihn un na Bremen gahn, dor Stadtmuskant warrn, denn de Stadtlucht maakt jo free. Op’n Weg na Bremen kaamt em de Reeg na en Hund, en Katt un en Hahn in de Mööt, de ok all to oolt sünd, un nich mehr to’t Jagen un Müüsfangen döögt oder in’e Supp schöölt. De Esel seggt jem, dat een wat beters as den Dood överall finnen deit un dat se mit na Bremen kamen schullen. Se wüllt nu furts all veer Muskanten in Bremen warrn. Bi Nacht kaamt se in en Holt un wüllt Lager opslaan. Dor seht se en Kaat in’t Holt. Se kiekt dör’t Finster un binnen sitt en Röverbann. Se maakt en Plaan: De Hund stellt sik op’n Rügg vun’n Esel, de Katt bi’n Hund baven op un de Hahn ganz toböverst. Denn maakt se groot Schandaal un de Rövers kriegt en bannigen Schreck un haut af. De veer Deerten loscheert sik sülven nu in dat Huus in. As de Rövers sik vun’n Schreck verhaalt hebbt, ordert de Baas een trüch na’t Huus, nakieken wat dat wesen is. He kummt in de düüstere Kaat rin, dor süht he de Ogen vun de Katt as glöhnige Köhlen in’n Düüster lüchten, de Katt jumpt op em daal un kratzt em in’t Gesicht. De Röver stöltert na buten, man op ´n Süll bitt em de Hunn in’t Been. Buten pett em de Esel noch in’n Oors un de Hahn kreiht em na. As de Röver na de annern trüchkeem, dor vertell he, dat dor en Hex binnen de Kaat weer, de harr em kratzt, in’e Döör, dor stünn en Keerl, de em mit ´n Mess staken harr un buten leeg en groot Undeert, dat em mit ´n Knüppel tosetten dee. Un op’t Dack, dor seet de Richter, de em „Bringt mi den Schelm her!“ naropen harr. Do weern de Rövers bang un kemen nich na de Kaat trüch. De Stadtmuskanten aver bleven in de Kaat un wullen gornich mehr na Bremen wieder.

Wat anner Lüüd dorto maakt hebbt

In Bremen an’t Raathuus steiht en Standbild vun de veer Muskanten. Dat hett de beröhmte Bildhauer Gerhard Marcks maakt. Ähnliche Standbiller staht ok in Riga un in dat westfäälsche Dörp Bremen.

Weblenken

• Dat Märken op Platt vertellt bi Radio Bremen (plattdüütsch)