Boreas (Mythologie)
De Boréas (greek. Βορέας, „de Nöördliche”, to verglieken mit de Bora μπόρα, de ok „kolen Regenschuer“ bedüden deit) weer in de Greeksche Mythologie de Gott vun den Noordenwind. He weer de Söhn vun Astraios un Eos. Boreas is tohopen mit siene Bröder Euros, Notos un Zephyros verehrt wurrn. Normolerwiese warrt he dorstellt as en olen Mann mit Flunken un struppelige Haar un willen Baart. Na de Legenn kümmt he ut dat Land vun de Skythen vun den Borysthenes in de hüdige Ukraine. Vun düssen Stroom Borysthenes schall he ok sien Naam vun hebben. As de Grootkönig Xerxes I. vun Persien Athen angriepen dö, dor hett dat Volk vun Athen to Boreas beedt. He schall denn dannige Winnen schickt hebben un 400 Schepe vun de Persers sünd unnergahn. Dor is Boreas en Schutzpatron vun Athen dör wurrn un hett dor ok en egen Tempel kregen. He is as de Mächtigst vun de Windgödder ankeken wurrn. Vunwegen dat he sunnerlich in'n Winter weiht, is Boreas ok en annern Naam för en kolen Noordwind wurrn. In de Röömsche Mythologie heet he Aquilo.
Literatur
[ännern | Bornkood ännern]- Karl Kerényi: Die Mythologie der Griechen - Die Götter- und Menschheitsgeschichten. dtv, München 1994. ISBN 3-423-30030-2
- Michael Grant und John Hazel: Lexikon der antiken Mythen und Gestalten. dtv, München 2004. ISBN 3-423-32508-9
- Robert von Ranke-Graves: Griechische Mythologie - Quellen und Deutung. rororo, Hamborg 2001. ISBN 3-499-55404-6
