Bodo Ramelow

Bodo Ramelow (2019)

Bodo Ramelow [ˈboːdo ˈʁaməlo] (* 16. Februar 1956 in Oosterholt-Scharmbeek) is en düütschen Politiker. He is siet'n 4. März 2020 Ministerpräsident vun Döringen.

Leven

Ramelow is 1956 as Söhn von Erwin Ramelow in Oosterholt-Scharmbeek (Neddersassen) boren un dor mit dree Geswister opwussen, bet he ölven Johr oold is. De Familie hett direkt in dat Zentrum bi’n Bahnhoff wahnt. Sien Vader is doodbleven, as he acht Johr oold weer. Denn is de Familie na Nieder-Wiesen in Hessen tagen.

He hett 1971 de Hauptschool afslaten un hett denn von 1971 bet 1974 bi Karstadt in Gießen en Lehr as Koopmann in’n Enkelthannel maakt. An de kaufmännische Berufsaufbauschule in Marburg hett Ramelow 1975 de Mittlere Reife maakt un 1977 an de kaufmännische Fachoberschule de Fachhoochschoolreife.

He hett von 1977 af an as Substitut bi de Karstadt AG un bi’n Koopmarkt HaWeGe in Marburg-Cappel arbeidt. Later is Ramelow Filiaalbaas bi de „Jöckel Vertriebs GmbH“ in Marburg worrn. En Utbiller-Prüfung na de Utbiller-Eignungsverordnung („AdA-Schien“) hett Ramelow an’t Enn von de Johren 1970 afleggt. Von 1981 bet 1990 weer he Gewerkschaftssekretär in Middelhessen, von 1990 bet 1999 Landsvörsitter von de Gewerkschaft HBV (vondaag ver.di) in Döringen un von 1992 bet 1999 Opsichtsraad-Vörsitter von de Wahnungsgenossenschaft „Zukunft“ in Erfurt.

Ramelow is in drüdde Eh verheiraadt.

Politik

Ramelow is in’n April 1999 Maat von de PDS worrn. He weer denn bi de Landdagswahl in Döringen 1999 Kannedaat för de PDs in’n Wahlkreis Erfurt III, kunn sik aver mit 23,6 % von de Eerststimmen nich dörsetten. He weer aver ok op Platz twee von de PDS-Landslist un is so in’n Landdag von Döringen intagen. Dor weer he von 1999 bet 2001 Viez-Frakschoonsvörsitter von de PDS. An’n 14. November 2001 is he to’n eersten Frakschoonsvörsitter wählt worrn.

To de Landdagswahl in Döringen 2004 is Ramelow as Spitzenkannedaat von sien Partei nomineert worrn un he hett in’n Wahlkreis Erfurt I mit 38,6 % von de Eerststimmen en Direktmandaat wunnen.

Bi de Bundsdagswahl 2005 is Ramelow in’n Bundsdagswahlkreis Gera – Jena – Saale-Holzland-Kreis antreden, kunn sik mit 29,4 % von de Eerststimmen nich gegen Volker Blumentritt von de SPD dörsetten. He is denn över de Döringen PDS-Landslist in’n 16. Düütschen Bundsdag intagen. Dormit is he to’n 17. Oktober 2005 ut’n Döringer Landdag rut.

Bi de Landdagswahl in Döringen 2009 weer Ramelow wedder Spitzenkannedaat von siene Partei (de nu De Linke heten hett, nadem de PDS 2007 mit de WASG tohoopgahn is). He hett in’n Wahlkreis Erfurt III mit 26,8 % von de Eerststimmen en Direktmandaat wunnen.

Bi de Landdagswahl in Döringen 2014 hett Ramelow in’n Wahlkreis Erfurt III gegen Marion Walsmann von de CDU verloren, is aver över Listenplatz 1 op de Landslist in’n Landdag intagen. De Linke is tweetstarkste Partei achter de CDU worrn, kunn aver in ene Koalitschoon mit SPD un Gröne de Regeren billen. Ramelow hett an’n 5. Dezember 2014 dat Amt as Ministerpräsident övernahmen un hett dat Kabinett Ramelow billt.

Bi de Landdagswahl in Döringen 2019 hett De Linke sik noch wedder verbetert un is mit 31,0 % starkste Kraft worrn.

Literatur

• Hans-Dieter Schütt: Gläubig und Genosse. Gespräche mit Bodo Ramelow. Karl-Dietz Verlag, Berlin 2006, ISBN 3-320-02074-9
• Stefan Wogawa: Die Akte Ramelow. Ein Abgeordneter im Visier der Geheimdienste. Karl-Dietz-Verlag, Berlin 2007, ISBN 978-3-320-02126-9, (PDF)
• Stefan Wogawa: Ein gewisser Herr Ramelow. Der Akte zweiter Teil. Eckhaus Verlag, Weimar 2014, ISBN 978-3-945294-03-1
• Landolf Scherzer: Der Rote. Macht und Ohnmacht des Regierens. Aufbau Verlag, Berlin 2015, ISBN 978-3-351-03621-8
• Stefan Wogawa (Hg.): "Es reicht nicht, Opposition zu sein". Bodo Ramelow in 162 Zitaten. THK Verlag, Arnstadt 2016, ISBN 978-3-945-068-07-6

Weblenken

Bodo Ramelow. Mehr Biller, Videos oder Audiodateien to’t Thema gifft dat bi Wikimedia Commons.