Bloodagar
Bloodagar warrt in de Mikrobiologie as Nehrbodden insett för Mikroorganismen, de dat Blood vun Söögdeerten to’n Wassen bruukt.
De Nehrbodden besteiht to 5 bit 10 % ut defibrineert Blood un gifft de Mööglichkeit sünnere Klassen vun Krankmakers natowiesen un de hämolyseren Egenschoppen vun antüchte Bakterien (to’n Bispeel Streptokokken) to beoordelen. Normalerwies warrt dorto Schaap- oder Peerblood nahmen, in enkelte Fäll ok dat Blood vun Swien oder Kaninken. Roor is de Bruuk vun Blood vun’n Minschen.
- α-Hämolyys (Vergrönen): De Bakterien produzeert keen Hämolysinen un laat op Bloodagar en Rebeet vun gröönliche Farv entstahn, de nich vun en echt Hämolyys kummt, man vun den Verlust vun Kalium in de ro’en Bloodkörpers.[1] De Redukschoon vun’t Hämoglobin to Biliverdin sorgt för de gröne Klöör. Dor sünd aver noch hele Erythrozyten antofinnen.
- β-Hämolyse: De Bakterien produzeert Streptolysin O oder S un sünd vun en kloor Hämolyysrebeet ümgeven. Dat Hämoglobin warrt dorbi vullstännig afboet, so dat sik dat hier üm en echte Hämolyys hannelt.[1]
- γ-Hämolyse: Disse Bakterien wiest gor keen Hämolyysverhollen.
De Kaakbloodagar (ok: Schokoladenagar) is en Afoort vun’n Bloodagar, bi de de Agar kort op 80 °C hitt maakt warrt.[2] Dordör kummt dat to en Lyys vun de Erythrozyten, de Hämin un NAD in den Agar freesett. Se künnt dor vun de Bakterien verstoffwesselt warrn, de sülvst nich hämolyseren doot (t. B. Haemophilus influenzae). Kaakbloodplaten warrt mitünner bi högere CO2-Spannung bröödt. Dormit künnt sik sünners Bakterien düütlich vermehren, de geern in CO2 leevt, as ok all Neisseria.
Kiek ok
[ännern | Bornkood ännern]- C.L.E.D.-Agar
- Endo-Agar
- MacConkey-Agar
- Mannit-Kaaksolt-Agar
- Müller-Hinton-Agar
- Sabouraud-Dextroos-Agar
Borns
[ännern | Bornkood ännern]- ↑ a b Michael T. Madigan, John M. Martinko, Jack Parker: Brock Mikrobiologie. Düütsche Översetten rutgeven vun Werner Goebel, 1. Oplaag. Spektrum Akademischer Verlag GmbH, Heidelbarg 2000, ISBN 978-3-8274-0566-1, S. 562
- ↑ Technische Informatschonen Blut-Agar (Basis) vun de Merck KGaA, afropen an’n 11. Februar 2013