Blockbuster (Filmgewarf)

Vun Wikipedia

As en Blockbuster (mitünner ok Event-Movie oder A-Movie) warrt in de Medien Kinoprodukschonen betekent, de sünners veel Geld inspeelt hebbt. De Bedüden lett sik an ehsten mit Översetten as „Stratenfeger“ oder „Kassenslager“ faten. De wöörtliche Översetten „Wahnblock-Sprenger“ geiht aver torüch op de Flegerbomben ut’n tweeten Weltkrieg, de den glieken Naam harrn[1].

Bedüden un Bruuk vun den Begreep[ännern | Bornkood ännern]

De Begreep is in de 1970er Johren faken bruukt worrn för Speelfilmen as to’n Bispeel Jaws oder Star Wars, de Tokiekers in grote Tall in de Kinos tagen hebbt. Dorbi hebbt sik an de Kinokassen so lange Minschenslangen billt, dat se deelwies üm hele Wahnblock rümrecken deen[2]. Rhetoorsch utdrückt hebbt disse Kino-Blockbusters as’n Bomb inslahn. In’n överdragen Sinn warrt so also en Film betekent, de wekenlang en Kino beleggen kann, vun wegen dat de Lüüd em so geern kieken doot un he – tomindst bi lütte Kinos – en Wessel vun’t Programm hinnern kann. De eerste Beleg för dissen metaphoorschen Bruuk vun den Begreep is 1942 in’t Oxford English Dictionary opduukt[3]. Dat Ne’e an’n Bruuk siet de 1970er Johren weer aver nich blots de düchtige kommerzielle Spood vun en Film. Dorto keem de nafolgen Marketingstrategie: Die Filmstudios hebbt dusende Kopien vun den Film maakt, de in jüst so veel Kinos to glieken Tiet wiest worrn sünd. Dordör kennen vele Lüüd to glieken Tiet den Film und snacken doröver, so dat de Acht vun noch mehr Minschen op den Film lenkt weer. Dordör harr man noch mehr Tokiekers. Im fröhere Tieten weern spoodrieke Filmen faken över’n längere Tiet in de Kinos, man dorför nich so gau op’n Slag.

Grundlaag för den kommerziellen Spood vun Blockbusters is to’n een de Inholt vun den Film, de mitrieten un den Smack vun de Lüüd to de Tiet vun’t Rutkamen drapen mutt. Wichtig is aver ok dat Filmbudget, dat för’t Vermarkten meist jüst so hooch ansett warrt as för de Produkschoon vun den Film sülvst (tomeist twüschen 50 un 200 Millionen Euro). De Film oder sien Titel warrt dorbi weltwiet bannig bekannt maakt, wiel över den Inholt an sik nich veel verraat warrt. Dat Utfinnen vun’t Blockbuster-Kino hett dat Enn vun’t so nöömte New Hollywood utlöst, wat tosamenkeem mit den Opstieg vun Steven Spielberg un George Lucas, de den Blockbuster in dat Filmgewarf inföhrt hebbt.

In Düütschland is de Begreep „Blockbuster“ bekannter worrn, as de private Feernsehsenner ProSieben 1994 anfüng, för de mehr oder minner spoodrieken Speelfilmen in jemehr Programm mit disse Beteken Warf to maken.

Kritik[ännern | Bornkood ännern]

Dat so nöömte Blockbuster-Kino warrt mitünner aver ok kritisch sehn, vun wegen de starke Kunzentratschoon op de kommerziellen Sieten un op’t Vermarkten. Dat sleiht sik neemlich daal in’n Inholt, in de Form, dat Anliggen un dat Ümsetten vun de Filmen. De hogen Kosten, de dör de Produkschoon un de Warf tostannen kamt, mööt dör den Film ok wedder innahmen warrn, so dat disse Filmen teemlich faken op Merchandising, Stars un olle bewährte Motiven un Plots kunzentreert sünd. För ne’e Formen un Vertellstrategien oder för noch unbekannte Dorstellers blifft dorbi nich veel Ruum. Kritische Themen, de nich in’n Middelpunkt vun de Apentlichkeit staht oder mit Problemen verbunnen sünd, warrt vun Blockbuster-Filmen normalerwies kuum bedeent. Man, dordör dat dat Blockbuster-Kino Deel vun de Populärkultur is, föhrt dat to den Indruck, dat de Filmkunst vör allen un alleen för’t Ünnerhollen dor is, wat so aver nich richtig is. Disse Gegensatz hett sik in de modernen Filmwelt al dordör fastsett, dat sik de Kinos vundaag in Programmkinos un Multiplex-Kinos ünnerscheedt.

Borns[ännern | Bornkood ännern]

  1. Eric Partridge et al. (Rgv.): The New Partridge Dictionary of Slang and Unconventional English. Routledge, New York 2006. Band I, S. 188, s. v. blockbuster.
  2. Bonusmaterial vun de Star Wars-Trilogie op DVD ut dat Johr 1997
  3. Oxford English Dictionary vun 1957