SV Blau-Witt Bornrieh

Vun Wikipedia
(wiederwiest vun Blau-Witt Bornrieh)

De Sportvereen Blau-Witt Bornrieh (hoochdüütsch SV Blau-Weiß Bornreihe) is en Footballvereen ut dat Dörp Bornrieh.

Historie[ännern | Bornkood ännern]

De Vereen is in’n März 1932 grünnt worrn. De Oort leeg in’t Düvelsmoor un dat hett to disse Tied noch keen faste Straten geven. De eerste Asphaltstraat keem 1952. Dorüm hett de Vereen eerst 1948 an’n regulären Speelbedriev deelnahmen. In de Johren 1950 is de eerste richtige Footballplatz anleggt worrn. Dorför sünd en poor dusend Kubikmeter Sand opföhrt worrn. Liekers weer dat noch to marken, dat de Bodden bi’t Oppedden nageven dee. Dat güng mit’n Vereen opwards, as Fritz Kahnwald 1959 as Trainer anfüng. Twee Johr later is de Vereen in de Staffel 6 von de Amateurliga Neddersassen opstegen. Noch veer Johr later hett sik de Vereen för de Verbandsliga Neddersassen Noord qualifizeert un is dor op Verenen so as Kickers Emden un VfL Ollnborg drapen. De Mannschop bestünn vör allen ut inheemsche Spelers. In dat Johr 1970 hett dat Wekenbladd Bild am Sonntag en Artikel bröcht, in den de Vereen as größter Fußballklub der Welt vörstellt worrn is, von wegen, dat de Vereen mit 170 Maten meist mehr Maten as dat Dörp Inwahners harr.

1971 is de Vereen Viezmeester achter VfB Ollnborg worrn. In de Midd von de Johren 1970 hett de Vereen gegen dat Afstiegen speelt. As de Verbandsligen 1979 oplööst worrn sünd, hett de SV Blau-Witt sik för de Landsliga Neddersassen West qualifizeert. 1982 is Bornrieh denn aver in de Bezirksoberliga afstegen. Eerst 1994 kunnen se wedder opstiegen in de Landsliga Lümborg. Von dor kunnen se 1999 opstiegen in de Neddersassenliga Oost. 2001 sünd se afstegen in de Landsliga un 2006 wedder opstegen in de Neddersassenliga. 2008 hebbt se sik för de Oberliga Neddersassen Oost qualifizeert. 2010 hett Bornrieh de Qualifikatschoon för de eengleisige Oberliga Neddersassen nich schafft un hett denn in de Landsliga Lümborg speelt. 2016 sünd se wedder in de Oberliga opstegen.

Spelers[ännern | Bornkood ännern]

Marko Kück hett in’e Jugend en Tied bi Bornrieh speelt.

Weblenken[ännern | Bornkood ännern]