Belize Inlet
De Belize Inlet is en Bucht oder Fjord (engelsch inlet) an de Küst von Brietsch-Kolumbien (Brietsch-Kolumbien, Kanada).
Geografie[ännern | Bornkood ännern]
Vör de Küst von Brietsch-Kolumbien warrt Vancouver Island dör de Queen Charlotte Strait von’n fasten Wall trennt. In düt Rebeed gaht de Slingsby Channel un de Schooner Channel in dat Binnenland rin un draapt sik dor. De beiden Waterstraten billt dormit Bramham Island. In dat smalle Rebeed, in dat sik Slingsby Channel un Schooner Channel draapt, doot de Nakwakto Rapids liggen. Binnenlands von de Nakwakto Rapids liggt en System von Fjorden, de in de Bargen von de Pacific Ranges rinreckt. De Süüdarm is de Seymour Inlet, de Middelarm is de Nugent Sound un de Noordarm de Belize Inlet.
De Belize Inlet besteiht ut en negen Kilometer langen Afsnidd, de von de Nakwakto Rapids na Noordwesten föhrt, un en 50 Kilometer langen Afsnidd, de von dor 50 Kilometer na Oosten föhrt.
Von’n Belize Inlet sülvs gaht noch wedder de Mereworth Sound un de Alison Sound af. An’n Westrand doot de Lassiter Bay un de Rowley Bay liggen.
Historie[ännern | Bornkood ännern]
De Bucht is in’n April 1865 von Koptein Pender von de Beaver nöömt worrn. De Seymour Inlet, von den de Belize Inlet afgeiht, is na Frederick Seymour nöömt, de to de Tied Guvernör von Brietsch-Kolumbien weer. Vörher is he bet 1864 Guvernör von Brietsch-Honduras ween, dat ok Belize nöömt worrn is. Dorüm hett Koptein Pender den Naam Belize Inlet utsöcht.
Koordinaten:51° 8′ N, 127° 17′ W