Belize (Angola)

Belize is en Oort in dat Município Belize, Provinz Cabinda, Angola.

In’n Oort leevt vör allen Minschen von dat Volk von de Yombe, de ok de Spraak Yombe snacken doot.

Geografie

De Oort liggt in de Region Mayombe un in en Rebeed, dat rundüm tropischen Regenwoold is. De Oort sülvs liggt op üm un bi 180 Meter över de See, aver en poor Kilometer wieder binnenlands reckt sik en Bargkamm, de bet op över 700 Meter hoogstiggt. De Straat na Miconge löppt över en Pass, de en Höögd von üm un bi 520 Meter över de See reckt.

De Öörd ümto sünd Luali in’n Noordwesten (mit de Mission Mboka), Miconge in’n Noordoosten un Buco Zau in’n Süüdwesten.

Weertschop un Infrastruktur

Verkehr

De Oort liggt an de Estrada Nacional 100 von Angola, de in’n Noordoosten an de Grenz na de Republik Kongo föhrt un dor bi Kimongo an de Regionaalstraat P2 anbunnen is. In’n Süüdwesten löppt de Estrada Nacional 100 över Buco Zau na Lândana an de Küst un wieder na Cabinda.