Badhotel Sternhagen

Dat Badhotel Sternhagen is en Hotel an’n Noordseestrand von Duhnen in Cuxhoben (Cuxhobener Straat 86). Dat Hotel hett den Status 5 Steerns Superior na dat System von de Hotelstars Union. Anslaten an dat Hotel is dat Restaurant Sterneck, dat mit twee Steerns in’n Guide Michelin uttekent is. Dat Sterneck hetten Wienkeller mit 540 Soorten Wien. Blangen dat Sterneck gifft dat ok noch de Restaurants Schaarhörn un Ekendöns.

Dat Hotel hett 48 Kamern von 38 bet 80 m² op fiev Etaaschen. Dat Hotel büddt en 1000 m² Wellness-Landschop mit Seewater.

In dat Hornstein-Ranking liggt dat Restaurant Stand 2014 op Platz 55 in Düütschland.

Historie

Dat Hotel is 1958 boot worrn un hett an’n 10. Juni 1958 apenmaakt. Toeerst hett dat Das Haus am Strand heten. Grünnt hebbt dat Jürgen (1928-2012) un Helga Sternhagen (1938-2009). De beiden weren vörher Bankkooplüüd un Jürgen Sternhagen hett 1958 noch sülvs mit müürt an de eerste Pangschoon, de op dat Land von sien Öllernhuus stünn. Disse eerste lütte Pangschoon is över de Johren bilütten jümmer mehr utboot worrn. Vondaag hett de Söhn Eick Sternhagen dat Leid över dat Hotel övernahmen.

An’n 15. November 2005 hebbt Jürgen un Helga Sternhagen för jemehr Arbeid för den Tourismus in Cuxhoben dat Verdeenstkrüüz an’t Band von’n Neddersassischen Verdeenstorden kregen.

Kökenbaas in dat Sterneck

1995-2012: Markus Kebschull
1. April 2012-: Marc Rennhack

Kökenbaas Markus Kebschull hett 2001 den eersten Michelin-Steern kregen un 2010 den tweten. Nadem 2012 Marc Rennhack Kökenbaas worrn is, hett he op’n Stutz ok glieks twee Michelin-Steerns kregen.