Bachman-Turner Overdrive
Bachman-Turner Overdrive, ok bekannt as BTO, is en kanaadsch Rockband ut Winnipeg, de in de 1970er Johren en Reeg vun Hits harr. Hör spoodriekst Titel is You Ain’t Seen Nothing Yet ut dat Johr 1974.
Musikalisch is BTO den fröhen Hard-Rock-Bands totoordnen. De Grupp speel ingängige, melodische Leeder, de vun prägnanten Gitarrenriffs dreeven weern.
Bandgeschichte[ännern | Bornkood ännern]
BTO entstunn ut de Band „Brave Belt“, de 1970 vun Randy Bachman un Chad Allan (vun The Guess Who) tosommen mit Robbie Bachman (18. Februar 1953 – 12. Januar 2023) un C. F. „Fred“ Turner grünnd wurrn weer. Oorsprünglich sull ok Keith Emerson vun The Nice mitmaaken, he is aber wegen Krankheit utfallen. Nah twee weniger spoodriek Alben wurr Chad Allan dör Tim Bachman (1. August 1951 – 28. April 2023) ersett, den darten vun de Bachman-Bröers. De Naam vun de Band wurr in Anlehnung an en LKW-Magazin in Bachman-Turner Overdrive ändert. Hör eerst Album mit ebenfalls dissen Naam keem 1973 herut.
Dat nächste Album, Bachman-Turner Overdrive II, weer in den USA un Kanada en groot Erfolg. Dorup weer de Hit Takin’ Care of Business, de ünner annern in twalf Filmen bruukt wurr.
Tim Bachman hett de Grupp verlaaten, um as Produzent to arbeiten, un wurr dör Blair Thornton ersett. Dat folgend Album Not Fragile keem 1974 herut, dorup weer de Nummer-een-Hit You Ain’t Seen Nothing Yet. De nächsten Alben weern Four Wheel Drive un Head On, beid ut 1975.
Nah dat Album Freeways (1977) hett Randy Bachman de Band verlaaten, fung en Solokarriere an un hett mit de Band Ironhorse arbeit. De verbleeven Rest vun BTO hett wiedere, nich besünners spoodriek Alben herutbrocht un hett sück sluutend uplööst.
In de 1980er Johren gungen twee weddervereenigt Bands up Tour, een ünner de Naam „Bachman-Turner Overdrive“ (mit Randy Bachman), de anner as „BTO“ (mit Robbie Bachman). In de Simpsons-Episode Ein Pferd für die Familie harrn se en Gastupträe. Mittlerwiel spelen Randy Bachman un Fred Turner as Duo „Bachman & Turner“ wedder tosommen, to’n Bispeel up dat Sweden Rock Festival 2010.
An‘n 3. November 2010 is Jim Clench in Montreal an Lungenkrebs storven. He weer nah 1975 tietwies Bassist vun de Band ween un harr tovör as ok nah 1992 bi April Wine speelt.[1] 2014 wurrn BTO mit de Upnahm in de Canadian Music Hall of Fame ehrt.[2]
Enkeld Nahwiesen[ännern | Bornkood ännern]
- ↑ Jim Clench – You Should Feel Like Celebrating 3. November 2010. In: theresaallore.com. 3. November 2010, afropen an’n 14. September 2016 (engelsch).
- ↑ Canadian Music Hall of Fame – Inductees. Canadian Music Hall of Fame, afropen an’n 6. August 2017 (engelsch).