Babyloonsche Tallen
De babyloonschen Tallen sünd en Tallsystem in Kielschrift, dat vun de olen Babyloniers bruukt worrn is. Dat Talltekensystem baseert op de Basis 10, dat Stellenweertsystem op de Basis 60. De Basis 60 hett sik wohrschienlich dörsett, vunwegen dat dat en dull tohoopsett Tall is.
Dat Tallsystem weer en Stellenweertsystem, dat heet, dat de Tall in Gruppen blangenenanner stellt worrn is. De Tall 1982 to’n Bispeel is as 33-2 schreven worrn (33 × 60 + 2 = 1982). Dat Tallsystem hett kene Null kennt. Wenn een vun de Gruppen leddig weer (120 to’n Bispeel is 2-0), denn kunn dat nich op eenfache Wies opschreven warrn. De Leser kunn dat denn licht as en 2 lesen. De Leser müss denn ut’n Kontext rutkennen, dat dat 2-0 un nich 2 weer, oder de Schriever müss en beten Platz leddig laten, wat aver ok swoor ruttokennen wesen kunn.
De babyloonschen Tallen sünd so bi 3100 v. Chr. opkamen.