Axel von Rappard
Axel Otto von Rappard (* 28. März 1871 in Langensalza; † 9. Januar 1961 in Berlin) weer en düütschen Verwaltungsbeamten.
Von Rappard is 1871 as Söhn von Olga Maria, borene von Mandelsloh (3. Oktober 1849-9. Juni 1930), un den hessischen Kamerherr Adolph Bertold Robert Louis Otto von Rappard (1. Januar 1843-19. Februar 1918) in Langensalza boren.[1] He hett Juristeree studeert un sien Dokter maakt. Na dat Studium is he in’n prüüßschen Staatsdeenst gahn. 1894 is he Gerichtsreferendar bi dat Amtsgericht Ehrenbreitstein un 1895 bi dat Amtsgericht Bockenheim, bi dat Landgericht Frankfort/Main un bi de Staatsanwaltschop Frankfort/Main worrn.[2] 1898 is he as Regerungsreferendar bi de Regerung in Sleswig anfungen un 1901 as Regerungsassesser bi dat Landraadsamt von’n Kreis Essen un bi de Regerung in Marienwerder.[2] He weer von 1907 bet Juli 1925 Landraad von’n Kreis Soltau.[2] Von 1925 bet 1927 wer he Regerungsraad bi dat Oberversekerungsamt Berlin un bi de Regerung in Mönster.[2] 1927 bet 1933 weer he Regerungsraad bi dat Oberpräsidium von de Provinz Brannenborg in Charlottenburg un bet 1936 bi de Prüüßsche Bo- un Finanzdirekschoon. 1936 is he in Rohstand gahn. Nadem 1941 in’n Tweten Weltkrieg de Landraad von’n Kreis Monschau, Kurt Dingerdissen, to’n Kriegsdeenst intagen worrn is, hett toeerst Heinz Ehmke dat Amt vertredungswies övernahmen. Nadem Ehmke ok intagen un fullen is, is an’n 23. Juni 1942 denn von Rappard vertredungswies Landraad worrn.[3] He is bet to’n 30. November 1943 Landraad bleven. To’n 1. Dezember 1943 hett Josef Schramm dat Amt övernahmen.[3]
Von Rappard weer ok Rechtsridder von’n Johanniter-Orden.[2]
He hett 1904 Alexandra von Dolega-Kozierowski (21. September 1884-2. August 1965) freet.[1] Mit ehr harr he de Döchter Alexandra Hedwig Olga (* 8. September 1905), Gertrud Erika (12. Juni 1907-3. August 1970), Alexandra (* 7. August 1909), Ellen (* 4. Januar 1912), Anna Elisabeth (* 23. Juli 1914) un Rosemarie (* 23. Juli 1914).[1]