Astrium Bremen
Astrium Bremen is en Wark vun den Konzern EADS Astrium in Bremen. In'n Updrag vun de ESA warrt dor dor dat Ruumlabor Columbus boot un unnerholen. Columbus is de europääsche Bidrag för de Internatschonale Ruumstatschoon (ISS). In dat Labor könnt allerhand Experimente in de Grundlagenforschung dörföhrt weern. In Bremen is dor en Bedrievszentrum för inricht wurrn, wat sik um den Bedriev vun dat Columbus-Labor in't All un den industriellen Bedriev vun de Anlagen scheren deit.
Bovenhen warrt bi Astrium Bremen de Böverste Deel vun de Ariane 5-Rakete boot. Mit düsse Raketen weert kommerzielle Satelliten in den Weltruum schaten. Bovenhen hett sik dat Bremer Wark an de Arbeit maakt, Transportsysteme för den Weltruum ut to finnen, de nich bloß eenmol bruukt weern könnt.
In de Reinkamern (Clear Rooms) in Bremen warrt, neven de Raketendeele un dat Weltruumlabor, ok dat Automaatsche Transport Fohrtüüch ATV för de ISS boot. ATV is en unbemannt Fohrtüüch, de bit to 6,5 Tons an Material un Göder na de Ruumstatschoon henbringen kann.
Geschichte
[ännern | Bornkood ännern]| Johr | Unnernehmen |
| 1961 | ERNO (Weser Flugzeugbau, Focke-Wulf, Hamburger Flugzeugbau) |
| 1963 | ERNO Raumfahrttechnik GmbH Bremen |
| 1981 | MBB-ERNO |
| 1989 | Düütsche Aerospace DASA |
| 1995 | Daimler-Benz Aerospace |
| 1998 | DaimlerChrysler Aerospace |
| 2000 | Astrium |
| 2003 | EADS Space Transportation |
| 2006 | EADS Astrium |
De Unnernehmen Focke-Wulf, Werser-Flegerbo un Hamborger Flegerbo (HFB) hefft 1961 en Arbeitsgemeenschop grünnt mit den Naam Entwicklungsring Nord (ERNO). Dat güng dor um, Kräfte tohopen to binnen för en europääsch Programm vun Drägerraketen. Vun 1963 af an hett düsse Verbund unner den Naam ERNO Ruumfohrttechnik sien Seet in Bremen harrt. Al in'n April 1963 hett ERNO den eersten Updrag kregen. Dor güng dat um Driftwarke bi.
De Europääsche Organisatschoon för Weltruumforschung ESRO hett ERNO unner de Arms grepen. Sunnerlich bi dat Utforschen vun Driftwarke hett sik de Firma gau en goden Naam maakt. ERNO hett den Updrag kregen, den Böversten Deel vun en Europa 1-Rakete (Drägerrakete ELDO) ut to denken un to boen. Bannig veel Anlagen sünd dormols inricht' wurrn. Twaars is ut dat ELDO-Programm amenne nix wurrn, man dat is denn doch de Grundlage för dat Ariane-Programm wurrn, wat allerbest lopen dö. Ok dor hett ERNO an wichtige Stäe bi mitmaakt. Dat Unnernehmen hett in düsse Tied ok in dat Satellitengeschäft mitspeelt. ERNO hett mitmaakt bi Forschungsprogramme, as bi de Sunnensonde Helios.
Vun 1974 af an hett ERNO dat Spacelab utwickelt. Dat weer dat wetenschoppliche Labor vun Europa för all Experimente mit dat Entbreken vun de Swaarkraft. En ganze Reeg vun Astronauten hefft dat Spacelab bruukt, dormank ok de eerste düütsche ESA-Astronaut Ulf Merbold.
In'n Januar 1981 is de ERNO Ruumfohrtechnik GmbH Deel vun de Firma Messerschmitt-Bölkow-Blohm (MBB) wurrn. Vun dor af an hett se MBB/ERNO heten.
In'n September 1989 is dat Unnernehmen en Deel vun de DASA wurrn. De weer vun Daimler-Benz, AEG, Dornier un MTU nee grünnt wurrn. Denn hett dat noch en poor mol nee Naams geven, bit in dat Johr 2000 Daimler siene Dochter Aerospace in en europääsch Unnernehmen, tohopen mit Aérospatiale-Matra un CASA unnerbrocht hett. Düt Unnernehmen hett den Naam EADS kregen. Vun dor af an is dat Bremer Wark en Deel vun den Ruumfohrtsektor Astrium, de to de EADS tohöörn deit.
Mitarbeiders
[ännern | Bornkood ännern]In dat Bremer EADS-Astrium Wark sünd in'n Momang (2010) um un bi 900 Mitarbeiders togange. Tolevern doot in de Region Bremen un umto noch mol bi 1.900 Beschäftigte.
Lage
[ännern | Bornkood ännern]EADS Astrium in Bremen liggt direktemang neven dat Airbus-Wark in de Airbus-Allee an'n Bremer Flegerhaben.
befindet sich unmittelbar neben dem Airbus-Werk in der Airbus-Allee am Bremer Flughafen.
Borns
[ännern | Bornkood ännern]- Deutsche Gesellschaft für Luft- und Raumfahrt
- DFG – Raumtransporter der nächsten Generation
- EADS N.V.
- EADS Astrium
- Fred Richter – Der nee Weg in't Weltall
- Ariane-Erfolg sorgt für neue Jobs – Hamburger Abendblatt, 16. Februar 2007
- Institut Arbeit und Wirtschaft der Universität Bremen (PDF-Datei; 380 kB)
- Olbers-Planetarium
- Raumfahrthistorisches Archiv Bremen
- Luft- und Raumfahrtgeschichte online beim BDLI
- euro engineering AEROSPACE
- Bremen Raumfahrt-Führung (PDF-Datei; 303 kB)