Arzamt
De Arzämter (oder Riekarzämter) sund de uppersten Hoffarzämter vun dat Hillige Röömsche Riek ween, dat bit to dat Johr 1806 bestahn hett. Jedet Arzamt weer tohopenknutt mit dat Kuramt. Vun dat latere Middeloller af an sund de Amtstitel blot man noch symboolsch ween, man wenn de Röömsch-düütsche König kröönt wurrn is, harrn de Inhebbers vun en Arzamt bi de Zeremonien wat to doon, toeerst in Aken, later in Frankfort an'n Main. In dat Middeloller sund de Kurförsten sülms bi de Zeremonien mit bi ween, man na de Reformatschoon hefft se sik meist blot noch verträen laten vun sunnerliche Familien ut den Adel. In düsse Familien sund de Ämter dör dat Arv wieter geven wurrn. Vundeswegen warrt ok vun Arvämter snackt. Mit de Tied hefft ok düsse Familien unner Umstänn ehr Amt fudder geven, so, datt bi en Krönung towielen dat Amt vun en Stellverträer vun en Stellverträer utöövt wurrn is.
Unner den Kaiser Karl IV. is in Karl IV. siene Gollen Bull in dat Johr 1356 fastleggt wurrn, wie de Arzämter verdeelt wurrn sund:
- de Dree geistlichen Kurförsten sund Arzkanzler ween, jedeen for een vun de dree Deele vun dat Riek:
- De Arzbischop vun Mainz for Düütschland ''Archicancellarius per Germaniam,
- De Arzbischop vun Köln for Rieksitalien Archicancellarius per Italiam,
- De Arzbischop vun Trier for Burgund mit de Hööftstadt Arles Archicancellarius per Galliam.
- De veer an un for sik weltlichen Kurförsten hefft düsse Arzämter utöövt:
- de Palzgreve bi Rhien is Arztruchsess ween. - Archidapifer, Amtsteken: Gollen Appel in rood Feld.
- De Hartog vun Sassen is Rieksmarschall ween:Archimareschallus, Amtsteken: Twee rode Sweerters over Krüüz (Rieksrennfahn).
- De Markgreve vun Brannenborg is Arzkamerherr ween: Archicamerarius, Amtsteken: Gollen Rieksstaff in blau Feld.
- De König vun Böhmen is Arzmundschenk ween: Archipincerna.
-
Archidapifer
Arz-Truchsess -
Archimareschallus
Arz-Marschall -
Archicamerarius
Arz-Kamerherr
.svg)