Arftholmen
De Arftholmen (däänsch Ertholmene) sünd ene Grupp vun Eilannen in de Oostsee. Se liggt üm un bi twintig Kilometer noordoosten vun Bornholm. Dormit sünd se de Deel vun Däänmark, de op’t wiedst in’n Oosten liggt (nipp un nau is dat de Felsen Østerskær).
To de Arftholmen (alltohoop 40 Hektar) höört de Eilannen Christiansø (nöömt na Krischan V.) mit 25 Hektar, Frederiksø (nöömt na Frederik IV.) mit veer Hektar, Græsholm (as Schutzrebeet för Vagels utwiest) mit ölven Hektar un en poor lüttjere Eilannen un Felsen (Møllebakke, Tat, Vesterskær, Østerskær, Lilleø, Høgebur, Tyveskær). Op Christiansø un Frederiksø leevt tohoop 92 Minschen (Stand vun’n 1. Januar 2006). Disse beiden Eilannen sünd ok dör en 30 Meter lang Footgängerbrüch verbunnen.
De Eilannen höört kene Kommun to, billt aver en Karkgemeen (de Kark is de Christiansø-Kark, boot 1821). Dat Regeer hett dat däänsche Ministerium för Verdedigen. Ene lütte School bestaht, in de de Kinner bet to de 7. Klass blieven köönt.
Vun Bedüden is de Tourismus na de Eilannen, 80.000 Lüüd kaamt elk Johr na de Arftholmen. Ok Fischerlüüd gifft dat op de Arftholmen.
1684 hett de däänsche Marine ünner Krischan V. ene Festung op de Arftholmen opboot. De Sund twischen de beiden Hööfteilannen weer en goden Haven. To de Tiet heten Christiansø un Frederiksø noch Kirkeholmen un Bodholmen. 1810 harrn de Eilannen mit 829 de gröttste Tall vun Inwahners in jemehr Geschicht. 1855 hett de Marine de Eilannen verlaten. De Grote Toorn op Christiansø, de Deel vun de Festung weer, warrt hüüt as Lüchttoorn bruukt. Op Frederiksø steiht de Lütte Toorn.
Weblenken[ännern | Bornkood ännern]
- Websteed vun Christiansø (däänsch, hoochdüütsch)
Koordinaten:55° 19′ N, 15° 11′ O