Aquitaansche Spraak

Vun Wikipedia
(wiederwiest vun Aquitaansch)

Aquitaansch is ene utstorvene Spraak, de de eenzige bekannte Verwandte to de basksche Spraak is. Dat Volk vun de Aquitaniers kummt toeerst bi Julius Cäsar in de Commentarii de bello Gallico vör. Dat schall in Aquitanien in’n Süüdwesten vun dat hüdige Frankriek leevt hebben un en ganz annere Spraak hatt hebben as de keltschen Galliers.

De Spraak sülvs is blot dör Naams in latiensche Graff- un Wiehinschriften bekannt. Üm un bi 400 Naams vun Lüüd un 70 Naams vun Gödder sünd överlevert. Vun de Grammatik is blot en ganz lütt beten bekannt dör de afleidt Formen vun Naams. De Verwandtschop mit dat Basksche is ut disse Resten aver al good to kennen. As de Römers Aquitanien innahmen harrn, dor sünd de Aquitaniers to de latiensche Spraak övergahn. En lütt Rest vun de Spraak hett sik as Substrat in dat Gascoignsche hollen.