Anton Dietrich von Wersebe (1865–1951)

Vun Wikipedia

Anton Dietrich von Wersebe (* 8. August 1865 in Hannover; † 26. Dezember 1951 in Meyenborg) weer en düütschen Jurist.

Von Wersebe is 1865 as Söhn von Theodora Wilhelmine Charlotte, borene Mylius (25. Juli 1837–16. März 1915), un Carl Friedrich von Wersebe (7. Dezember 1835–30. Dezember 1916) in Hannover boren.[1] He hett Juristeree studeert.

As sien Unkel Adolph Nicolaus von Wersebe (12. September 1829–26. März 1908) 1908 ahn Kinner doodbleven is, hett Anton Dietrich von em dat Good Meyenborg arvt.[2] Op’n Ridderdag an’n 3. November 1909 is he mit dat Good Meyenborg in de Ridderschop opnahmen worrn.[2] Na’n Dood von sien Vader 1916 weer he ok Herr op dat Good Kassbrook.

Later stünn he in Bückeborg in de Deensten von’n Först von Schaumborg-Lippe un hett dor de Titels von en Kamerherr un en Hoffkamerraad kregen. He weer ok för en Tied Afornten in’n Landdag von Schaumborg-Lippe. Bi’n Landskarkendag 1931–1932 von de Evangeelsch-luthersche Landskark Hannover weer he Präsident.

He is op’n Ridderdag an’n 12. November 1920 as Präsident von de Ridderschop von dat Hertogdom Bremen wählt worrn.[2] Dat Amt harr he, bet he op’n Ridderdag an’n 27. November 1941 dat Amt ut Öllersgrünn afgeven hett.[2] 1948 hett he dat Good Meyenborg an sien Söhn Hermann afgeven.[2] Dat Stimmrecht in de Ridderschop hett he för dat Good Kassbrook aver noch behollen.[2]

Von Wersebe hett an’n 16. März 1897 in Wiesbaden Sophie Elsa Wilhelmine Therese von Born (9. Mai 1875–24. November 1960) freet.[3][4] De beiden harrn de Kinner Theodore Wilhelmine Gertrud Erika (* 31. Juli 1899), Anna Ämilia Bertha Gisela (* 22. Dezember 1900), Clara Luise Ottilie Martha (* 25. Januar 1902), Wilhelm Ortwin Hermann Alverich (15. März 1906–14. August 1983), Georg Ortgies (10. Oktober 1910–26. Juli 1941) un Hermann von Wersebe. Von Wersebe is an’n 26. Dezember 1951 doodbleven un an’n 30. Dezember in Meyenborg begraven worrn.

Footnoten[ännern | Bornkood ännern]

  1. Kaestner & von Urach's Genealogisches Adelslexikon
  2. a b c d e f Nachlaß Anton D. von Wersebe (Ritterschaftspräs. 1920-1940) in dat Archivinformatschoonssystem Neddersassen
  3. Hans Friedrich von Ehrenkrook: Genealogisches Handbuch der fürstlichen Häuser., Band 15;Band 112, C.A. Starke, 1997, Sied 520
  4. Indrag op de Websteed von’n Vereen för Computergenealogie