Antakshari

Antakshari (Hindi अन्ताक्षरी, ant Enn, akshar Bookstaav) is en Speel för twee oder mehr Spelers, dat faken in Indien un Pakistan speelt warrt. Bi dat Speel geiht dat dor üm, Leder ut Bollywood-Filmen to kennen. Een Speler fangt an un singt de eersten Regen (opminnst twee Regen) vun en Leed. Denn mutt de twete Speler den letzten Bookstaven (Devanagari-Bookstaav) vun de toletzt sungene Reeg nehmen un en Leed ansingen, dat mit dissen Bookstaav anfangt. So geiht dat reegüm. Een Leed kann nich tweemal sungen warrn. De indischen Filmen hebbt jümmer en Barg Leder, de dor bi sungen warrt, se sünd meist lüttje Musicals. De Filmen un Leder sünd temlich populär in Indien un vele Lüüd kennt hunnerte vun Leder. So kann dat Speel lang duern. Dat Speel is mehr en Spaaßspeel un dat geiht nich toeerst üm dat winnen. Dat geev aver ok ene Show in’t indische Feernsehn op Zee TV, de Antakshari heten dee un bi de dit Speel speelt worrn is.