Andreas Weber (Verwaltungsbeamten)

Andreas Weber (* 3. September 1957 in Rodenborg) is en düütschen Verwaltungsbeamten.

Weber is 1957 in Rodenborg boren un dor ok opwussen. Von 1963 bet 1967 weer he op de Stadtschool Rodenborg un von 1967 bet 1976 op dat Raadsgymnasium Rodenborg. Na de School hett he en Lehr bi de Bereitschaftspolizei in Bremen maakt. He is 1979 Beamten op de Polizeiwach in de Sandstraten in de Bremer Binnenstadt worrn un 1980 op dat Revier in Oosterholt. Von 1982 bet 1985 hett he an de Hoochschool för Öffentliche Verwaltung studeert un dor en Bachelor-Afsluss as Diplomverwaltungsbedrievsweert för den Fachbereich Polizei maakt. 1985 keem he as Beamten an dat Polizeirevier in de Bremer Binnenstadt un 1987 op dat Revier in Hemeln. 1990 bet 1992 hett he noch wedder studeert un an de Polizeiführungsakademie in Hiltrup en Master-Afsluss Diplomverwaltungsbedrievsweert för den Fachbereich Polizei maakt. He is 1992 Beamten in dat Laagzentrum von dat Polizeipräsidium Bremen worrn, 1993 Baas von dat Afdeel Logistik in dat Polizeipräsidium un 1997 Viezbaas von de Bereitschaftspolizei Bremen. 1999 is he Baas von de Fachdirekschoon Logistik bi de Polizei Bremen worrn un 2003 Baas von de Bereitschaftspolizei Bremen. 2009 is he denn Baas von de Kriminalpolizei un dat Landskriminalamt Bremen worrn.

2011 is Weber in’n Stadtraad von de Stadt Rodenborg wählt worrn.

2014 weer Weber ok Kannedaat bi de Wahl to’n hauptamtlichen Börgermeester von de Stadt Rodenborg. He hett de Wahl mit 55,8 % von de Stimmen wunnen un sik dormit gegen sien Vörgänger Detlef Eichinger dörsett. Weber hett dat Amt an’n 1. November 2014 övernahmen.

Weber hett 1979 in de Stadtkark in Rodenborg siene Fro Claudia freet. De beiden hebbt dree Kinner.

Weblenken

• Weber sien Websteed (hoochdüütsch)