Andrea Debono

Vun Wikipedia

Andrea Debono (* 7. November 1821 in Senglean; † 29. Oktober 1871) weer en Opdecker ut Malta.

Debono harr Medizin un Chemie studeert. He leev mit de Familie in Alexandria un Debono weer dor Dokter in’t Krankenhuus. Na den Dood vun siene Öllern güng he na Kairo un 1848 na Khartoum. Dor weer he Ünnernehmer un hett ene Möhl un ene Firma för Bobedarf hatt. Vun 1851 an arbeidt he för den Guvernör vun’n Sudan un nehm den islaamschen Naam Latif Effendi an. Nu weer he as Hannelsmann för Elfenbeen an’n Witten Nil in’e Gang. Dorbi weer he ok as Opdecker aktiv. He weer de eerste, de den Stroom Sobat un den Nil bi Gondokoro utforsch.

He help 1862 de Opdeckers John Hanning Speke un James Augustus Grant mit Föhrers ut as se op de Söök na de Nilborns Problemen mit inheemsche Kriegers kregen. In dit Johr geev he ok en Book över siene Reisen rut.