Adolf Merckle

Vun Wikipedia

Adolf Merckle (* 18. März 1934 in Dresden; † 5. Januar 2009 bi Blaubeuren) weer en düütsch Jurist, Anlegger, Ünnernehmer un Milliardär.

Leven[ännern | Bornkood ännern]

Adolf Merckle is an’n 18. März 1934 in Dresden in en Ünnernehmerfamilie boren wurrn. Sien Vadder Ludwig hett in de tweete Generatschoon de Firma „Adolf Merckle en gros“ föhrt. Düsse Firma weer 1881 in Böhmen in Aussig grünnt wurrn. He harr dat Ünnernehmen vun sien Vadder 1915 övernahmen un dor noch twee Fabriken för pharmazeutsche Produkten hento föögt. Nadem de Familie allens wegnahmen wurrn weer, is se 1945 ut dat Sudetenland utbüxt.[1] Ludwig Merckle hett de Merckle GmbH in de Heimat vun siene Fro, in Blaubeuren an de Swääbsche Alb, wedder upboot. Siene Fro keem ut de Fabrikantenfamilie Spohn ut Ravensborg. Düsse Familie harr sik en Naam maakt mit dat Herstellen vun Fohrtüüchdelen för Maybach-Luxusautos.

Adolf Merckle studeer Wetenschop vun dat Recht in Tübingen, Hamborg un Grenoble. Bit 1967 hett he denn as Afkaat in Hamborg arbeit’. Denn arv he den Arzneimiddelbedriev in Blaubeuren vun sien Vadder. Düsse Bedriev hett dormols 80 Mitarbeiders harrt un bi veer Millionen Düütsche Mark in’t Johr umsett’. Merckle hett dat Unnernehmen glieks utboot to en Konzern mit ganz unnerscheedliche Twiegen. 1974 hett he in Blaubeuten dat Unnernehmen Ratiopharm grünnt, wat hüdigendags in Ulm sitten deit. 1991 hett he dat Öko-Contolling inföhrt. 1994 weer dat sowiet un he grünn den Pharmagroothannel Phoenix Pharmahannel AG.

Merckle güng ok bi un bedeelig siene Firma an ganz verschedene annere Gruppen, as HeidelbergCement, Kässbohrer Gelännfohrtüüch un de Metallwarken vun Zollern. Ok de Gruschwitz Textilwarken höörn em to, just so, as en Skilift in dat Lütt Walserdaal. Ok bi Windkraftanlagen weer he mit bi, vunwegen dat de gröttste Deel vun dat Unnernehmen in’n Elektromaschinenbo VEM Sassenwark em höörn dö.

1994 hett he ok dat Goot Hogen Luckow bi Rostock köfft un mit veel Geld up Schick bröcht. In dat Slott weern de Deelnehmers vun dat G8-Drepen in Hillgendamm 2007 siene Gäste.

Dood[ännern | Bornkood ännern]

An’n Avend vun’n 5. Januar 2009 is Adolf Merckle nich wiet af vun sien Huus in den Oortsdeel Weiler/Blaubeuren vun en Tog dootfohrt wurrn. De Polizei hett utslaten, dat he ümbröcht wurrn is, vunwegen dat he en Afscheedsbreef achter laten harr. De Familie Merckle hett denn ok verklaart, dat Merckle vunwegen de Finanzproblemen in siene Ünnernehmen sik süms ümbröcht hett: „De weertschoppliche Noot vun siene Ünnernehmen, de vunwegen de Finanzkrise tostanne kamen is, un de Unsekerheiten in de lesten Weken, dorto noch de Ohnmacht, dat he nix mehr maken konn, hefft den Ünnernehmer mit Hart un Seel braken, un he hett sien Leven en Enne maakt“[2][3][4] Mit en privat Vermögen vun 12,8 Milliarden Dollars weer he an’t Enne vun sien Leven de föfft riekste Düütsche[5]

Fehlspekulatschonen[ännern | Bornkood ännern]

An’t Enne vun’n Oktober 2008 hett Merckle mit Fehlspekulatschonen up Volkswagen-Aktien bit hen to ene Milliarde Euro verloren.[6] Dorbi güng dat nich bloß üm sien privat Vermögen, man ok um de Insovenz vun siene Ünnernehmen. Merckle hett dor an denken mösst, siene Firma Ratiopharm to verkopen.[7], dormit he tominnst siene Firma Heidelberger Zement up Kurs holen konn.[8] Na Informatschonen ut de Presse hett de Merckle Ünnernehmensgruppe mit ehre bi 100.000 Mitarbeiders un en Umsatz vun bi 30 Milliarden Euro Finanzschullen vun üm un bi 16 Milliarden Euro.

Belegen[ännern | Bornkood ännern]

  1. FAZ: Merckles Idylle liegt in Scherben 6. Dezember 2008
  2. Milliardär Merckle begeht Selbstmord, Spiegel Online, 6. Januar 2009
  3. [1], SWR Nachrichten, 6. Januar 2009
  4. Porträt Adolf Merckle - vom Anwalt zum Konzernchef
  5. http://www.forbes.com/2007/03/07/billionaires-worlds-richest_07billionaires_cz_lk_af_0308billie_land.html
  6. Fehlspekulationen: Sanierungsfall Merckle. PZ-Nachrichten der Pharmazeutischen Zeitung vom 17. November 2008
  7. Susanne Preuß: Adolf Merckle verhandelt über Staatsbürgschaft in: FAZ.net vom 17. Oktober 2008
  8. Spekulationen um Ratiopharm. PZ-Nachrichten der Pharmazeutischen Zeitung vom 17. November 2008