Èric Bertran

Èric Bertran (* 4. April 1990 in Barcelona) is en katalaanschen Schöler, de as Terrorist anklaagt weer. Bertran harr in’n September 2004 en Nettbreef an dree Firmen schreven. He weer do 14 Johr oolt. He nehm an de Kampagne vun Ünnerstütters vun de katalaansche Spraak deel, de katalaanschen Text op de Verpackungen vun de Saken bringen wullen, de een so in’n Supermarkt köpen kann. Bertran harr ünnerschreven mit Èric i l'Exèrcit del Fènix, wat Èric un de Armee vun’n Phoenix bedüden deit. Dat weer anlehnt an den Titel vun dat Harry-Potter-Book Harry Potter and the Order of the Phoenix (op Platt soveel as Harry Potter un de Orden vun’n Phoenix). Dat weer bi de Firmen apenbor ganz anners ankamen. De Supermarkt-Keed Dia hett den Breef de Polizei tostüürt un se kemen en poor Daag later mit 20 Anti-Terror-Schutzlüüd na Bertran sien Tohuus un wullen em un siene Armee inkasseren. Harrn dat woll för’n Terroristenzell hollen. Nu sünd se aver nich mit’n inknickten Steert wedder aftagen, nee, se wullen den Jung groot vör Gericht stellen, he harr terroristisch droht.

Vör dat Natschonale Gericht in Madrid güng dat denn noch wieder. Bertran wull sik vör Gericht in siene Mudderspraak verdedigen, nich op Spaansch. He dee op en Översetter bestahn. Un he wull vör Gericht ok nich as Spanier gellen, man as Katalanen. Dor hebbt se sogor Kinnerpsychologen op em dal schickt, wat mit sien Denken un Benehmen ok allens in’e Reeg weer.

Siene Öllern hebbt denn wedder vör’n Europääschen Gerichtshoff för de Minschenrechten gegen Spanien klaagt, dat se dat Kind so schikaneren deen. Dor is aver noch nix bi rut. In Katalonien is Bertran to en Symbolfigur worrn, de för dat Fechten för dat Goodkennen vun de katalaansche Spraak steiht.

Vun de ganze Saak hett de katalaansche Schriever Víctor Alexandre dat satirische Theaterstück Èric i l’Exèrcit del Fènix vun maakt.

Weblenken

Dokmentatschoon över Bertran sien Fall op YouTube (katalaansch mit engelsch Ünnertitels)